Governu Apoia US$ 60.000 ba Reprezentasaun Permanente Arabe Saaraui iha TL

DILI, www.news-viptv.com – Maski sedauk hetan rekonesementu hosi komunidade internasional nu´udar nasaun soberanu, Reprezentante Permanente Republika Demokrátika Arabe Saaraui iha Dili, Timor-Leste (TL) hetan tulun donativu ho valor orsamentu US$ 60.000.

Apoia orsamentu ne´ebe Governu TL foun ne´e aprova iha Sorumutuk Konsellu Ministru ba Projetu Rezolusaun Governu kona-ba donativu ho valór US$ 60.000 atu fó ba Reprezentasaun Permanente Repúblika Demokrátika Árabe Saaraui, aprezenta husi Ministra Negósiu Estranjeirus no Kooperasaun, Adaljiza Albertina Xavier Magno.

Iha komunikadu imprensa ne´ebe publika hosi Prezidensia Konsellu Ministru, medida ne’e atu hametin filafali lasu istóriku sira ne’ebé kesi Timor-Leste ho Repúblika Demokrártika  Árabe Saaraui, bazeia ba dejezu komun hodi luta ba autodeterminasaun, iha prinsípiu solidariedade hodi luta ba libertasaun nasionál no iha direitu ba autodeterminasaun no independénsia, ne’ebé hatuúr iha Konstituisaun Repúblika, iha Rezolusaun Parlamentu Nasionál kona-ba solidariedade no apoiu ba povu Saaraui, no iha faktu katak Timor-Leste kontribui ona, hahú kedas iha tinan 2011, funsionamentu Reprezentasaun Permanente Saaraui iha Dili.

Liuhusi konsesaun subsísiu anuál ida ba ezersísiu husi ninia atividade sira iha Timor-Leste no iha rejiaun.

Iha diskursu Ministra Adaljiza Magno iha Segementu Nivel Altu sessaun ba dala 52 Direitus Humanus iha Jeneva, 28 fevereiru 2023, Timor-Leste apela ba Nasoen Unidas atu halo referendum ba povu Arabe Saaraui.

“Hau husu atensaun ba konsellu ba situasaun ne´ebe infrenta hosi Povu Saaraui. Ami la menta los ho laiha progressu, okupasaun no failla atu hao referendum, no ami repete hikas ami nia apela hodi fo direitu autodeterminasaun ba povu Saaraui bazeia ba UN Charter,” dehan Adaljiza Magno.

Dadauk ne´e Arabe Saaraui sei konsidera nu´udar parte teritoriu Maroko nian, maski hetan ona nia independensia hosi Espana iha tinan 1975.