COVID-19 I Numeru Kazu Ativu Kontinua Tun, Mate Aumenta 1

DILI, news-viptv.com – Kazu foun COVID-19 hahu tuun no numeru ba kazu ativu mos kontinua tun, maski Sala Situasaun Sentru Integradu Jestaun Integradu (SS-SIJK) kontinua rejista tan aumenta ida (1) ba ema mate.

Liu hosi komunikadu imprensa ne’ebe Dr. Rui Maria de Araujo publika, Kordenador Forsa-Tarefa Prevensaun no Mitigasaun Surtu COVID-19 iha Timor-Leste ne’e relata númeru kazu detetadu foun reduz barak liu tan, kompara ho horiseik & kazu rekuperadu nafatin barak-liu kazu detetatu foun.

“Númeru óbitu 1 (ida) no Númeru ema ne’ebé hala’o tratamentu ospitalizadu reduz, kompara ho horiseik,” informa Dr. Rui Araujo.

Ba Kazu foun, ohin relata iha ema nain 39 maka pozitivu COVID-19, ne’ebe numeru ne’e mai hosi Munisipiu Dili 20 no Munisípiu seluk 19. Ho numeru ne’e, SIJK relata kazu ativu dadauk ne’e iha numeru 1.675, hafoin relata rekuperadu ema nain 251.

Husi totál kazu detetadu foun ohin, kazu 22 (56,4%) maka sintomátiku (hatudu sintomas). Husi kazu detetadu foun ohin, 7 (18%) simu ona vasina kompletu 7 (18%) simu ona vasina doze dahuluk.

Mate ida ne’ebe relata ohin maka Mane idade 75, hela iha Dili, seiduak vasina, iha 13 setembru 2021, diagnóstikadu iha HNGV ho sindroma insufisiénsia respiratória aguda (SIRA) tanba Covid-19. Horikalan matebian is-tuku 23h10 iha Vera Cruz.

Ho aumenta mate ida, Timor-Leste rejista ona ema mate nain 104.