Baucau Prontu Lori Vitoria Horta ba PR

BAUCAU, www.news-viptv.com – Apoiante Kandidatura Prezidenti Republika, Jose Ramos Horta kontinua sulin hodi lori vitoria ba kandidatura ne’e eleitu ba Prezidenti Republika ba Periodu 2022-2027.

Apoia ne’e laos mai hosi Kapital Dili, maibe mai mos hosi Munisipiu Baucau ne’ebe Grupu Movimentu boot haat (4) iha Munisipiu Baucau hanesan, Movimentu Rezistensia Apoia Maun Boot Xanana (MRAMBX) Movimentu Civika Nasionalista Timorense (MCNT), Movimentu Brigada Negra Munisipiu Baucau (MBNMB) no Movimentu Lider Komunitariu (xefe suku) deklara ofisialmente prontu organiza povu lori Lider Instoriku Kay Rala Xanana Gusmão no Ramos Horta kaer hikas ukun.

Movimentu hirak ne’e hato’o deklarasaun aberta ne’e bainhira hala’o enkontru ho Premiadu Nobel da Paz, Jose Ramos Horta iha salaun enkontru Igreja Katederal Dili, domingu (06/02/22).

“Ho konfiansa ami junta ona, ami sei lori hikas Maun boot Ramos Horta ba Aitarak-Laran no movimentu sei hakasan tama sai uma ba uma hodi fanun ita nia inan aman no joven sira hodi vota ba maun Ramos Horta no Maun Xanana,” dehan Koordenadór Movimentu Rezistensia Apoia Maun Boot Xanana, Carlos dos Santos iha deskursu.

Dadaun ne’e movimentu hirak ne’e hala’o dor to dor ka tama sai uma komunidade hodi esplika ba povu kona-ba fukun ba krize politika ne’ebé akontese so bele hadia hikas hosi Xanana no Ramos Horta liu hosi ukun.

 Fatin hanesan, Koordenadór Movimentu Civika Nasionalista Timorens, Kordenador Agapito Cabral dehan, uniku Xanana no Horta maka bele hakotu krize politika liu hosi ukun ne’ebé matenek no hatene halibur massa krida paz no hadia ekonomia nasaun no promove naran Timór ba mundu.

Parte seluk, Koordenadór Movimentu Brigada Negra Munisipiu Baucau, Fransisco Casimiro da Costa deklara sira ho ekipa Movimentu Lider Komunitariu ne’ebé reprezenta hosi autoridade suku kuaze 35 iha Baucau kontinua servisu makas hodi lori votoria ba Xanana no Horta.

“Ami prontu ona lori ita boot ba Aitarak-Laran, tanba ekipa rezistensia sei hamarik iha ita boot nia kotuk hodi tamas ai uma komunidade,” tenik nia.

Fatin hanesan, Reprezentante Organizasaun Juventude Partidu (OJP-CNRT), José Virgilio Guterres dehan,  iha konferensia nasionál CNRT ne’ebé hala’o iha loron 23 Janeiru 2022, deside hili Laureadu Nobel da Paz, Dr. Jose Ramos Horta sai Kandidatu CNRT nian ba Prezidente Republika periodu 2022-2027.

“Ita lori maun Boot Ramos Horta atu hamos aitarak ne’ebé nakonu hela iha Palasiu Prezidente Aitarak-Laran no sai prezidente ba povu tomak, la’ós sai fali prezidente ba partidu ka grupu politiku sira,” tenik nia.

Iha konferensista Partidu CNRT deklara, Ramos Horta kandidatu ida ne’ebé prienxe duni rekizitu sira ne’ebé CNRT hatuur ona.

Rekizitu sira ne’e maka hanesan, 1) PR eleitu komprometidu atu respeita no halo tuir de’it saida maka Konstituisaun RDTL haruka, 2) PR eleitu komprometidu atu hatuur fali orden konstitusional ne’ebé politiku má-fé sira sobu no estraga tiha ona.

3). PR eleitu komprometidu atu hatuur hikas lejitimidade no dignidade orgaun Parlamentu Nasionál ne’ebé partidu ambisiozu sira halo Asaltu Poder hodi sobu orgaun ida ne’e iha 19 Maiu 2020;

Alende ida ne’e, 4). PR eleitu komprometidu atu restaura fali lejitimidade no funsionamentu normal orgaun Governu ne’ebé dezde 2020 la-funsiona ho normal ne’ebé rezulta ekonomia rai laran hakdasak ba beibeik, 5). PR eleitu komprometidu atu halo reforma iha setor judisiariu nune’e bele garante no asegura aplikasaun Lei no Orden, liu-liu bele garante justisa tuir Konstituisaun no Lei sira haruka no 6) PR eleitu komprometidu atu lahalo Prezidensia Republika sai fali opozisaun ba Governu, nune’e Governu tuir mai bele atinje estadu tomak nia objetivu atu dada Kadoras Greater Sunrise mai Timor-Leste.

Entretantu, Premiadu Nobe da Paz, José Ramos Horta dehan, nia parte prepara ona ajenda no materia ne’ebé sei fó sai durante ninia kampaña politika, bainhira eleitu sai prezidente sei hadia hikas imajen estadu Timor-Leste no rezolve problema iha orgaun soberania sira hanesan, Parlamentu Nasionál, Tribunál.

Horta mós hato’o ba grupu massa no vimentu hirak ne’ebé kontinua fó fiar ba nia eleitu dala ida tan sai xefe estadu ba periodu 2022-2024.

“Ami rua maun Xanana sei ko’alia  barak liu bainhira iha kampaña, tinan barak ami rua la’o hamutuk haree ita nia estadu ne’e la’o fali ba kotuk, tanba ita nia diplomata sira mós haree no preokupa ita nia situasaun politika no ekonomia ne’ebé monu makas loos,” nia hatete.

Koordenador Jerál Organizasaun Sagrada Familia, Munisipiu Baucau, Agostinho Gusmão Braz dehan agora dadaun partidu FRETILIN Baucau komesa nakfera, tanba nia rasik organiza massa apoia Xanan no Horta.

“FRETILIN agora tuur la hakmatek, tanba ha’u halo mobilizasaun nafatin, massa atu Baucau sai ita boot (Ramos Horta) nian, tanba joventude no autoridade sira sei hamarik iha ita boot nia kotuk, tanba tempu ona, ba Xanana no Ramos Horta” nia hatete.

Reprezentante Veteranus Baucau, António da Costa “Derok Masin” dehan veteranu Baucau sei apoia kandidatu ida ne’ebé Komandante En-Xefe das FALINTIL, Kay Rala Xanana Gusmão tula liman.

Nia dehan, Horta iha kapasidade masimu atu hadia hikas nasaun no komprometidu atu reinpoin prinsipiu no valores K-RDTL.

Entretantu, hafoin ekontru ho movimentu politiku sira, Kordenador P-CNRT Munisipiu Baucau, Virgilio Pereira hamutuk ho Ramos Horta lansa kedas sede ekipa susesu prezidente republika, Jose Ramos Horta iha Aldeia, Lutumutu, Suku, Trilolo, Munisipiu Baucau-Vila.