DILI, www.news-viptv.com – Timor-Leste kontinua esforsu atu tinan 2025 Timor-Leste tama ona membru kompletu ba Association of Southeast Asian Nations (ASEAN).
Ministru Negosiu Estranjeiru no koperasaun (MNEK), Bendito Freitas hateten, ho servisu makas ne’ebe governu halo liu husi Vise Ministra assuntu ASEAN, membru governu ne’e deklara tinan 2025, Timor-Leste tenki tama ASEAN.
“Hau hanoin ida nee servisu ida ne’ebe IX Governu Konstitusionál fo prioridade teb-tebes no urgensia ba ita nia Vise Ministru asuntus ASEAN hodi servisu makas. Ita espera katak tinan ida ne’e tenkeser tama ASEAN,” hateten Bendito Freitas ba jornalista sira hafoin inkontru ho Prezidente Repúblika (PR), Jose Ramos-Horta, Kinta (30/1/2025), iha Palásiu Prezidensiál, Dili.
Iha inkontru ho xefi estadu, akompana vise ministra assuntu ASEAN no Sekretariu Jeral MNEK, alende koalia kona ba ASEAN, xefi estadu mos fo hanoin ba politika foun lideransa global sira, inklui Prezidenti foun Estadu Unidos Amerikanu.
“Asuntu balun mos ne’ebe ke Prezidenti fo ninia hanoin nia pensamentu mai ami liuliu kona-ba mudansa nebe ke ba hasoru iha lider polítiku global nian, Estadu Unidos Amerika ho Prezidente foun ho politika ne’ebe ke ba futuru no implikasaun mai iha Timor-Leste,” dehan membru governu ne’e.
Timor-Leste iha adezasaun ASEAN hatama ona nia aplikasaun desde tinan 2011, no iha 2022 estadu membru ASEAN fo estatutu observador ba Timor-Leste. Desde 2023, Timor-Leste partisipa ona inkontru hotu ASEAN nian no loke ona nia embaixada iha estadu membru ASEAN sira.