banner 1000x250

Assanami : Vitoria Kandidatura PD, Vitoria ba Timor-Leste

  • Share
Mariano "Assanami Sabino atual Prezidenti Partido Democratico (PD) sei reprezenta PD ba kandidatura Prezidenti Republika hodi kompete iha Eleisaun Presidensial 19 Marsu 2022. Photo : Assanismo
banner 728x90

DILI, www.news-viptv.com – Kandidatu Prezidenti Republika (PR), Mariano “Assanami” Sabino atual Prezidenti Partido Democratico (PD) hateten vitoria ne’ebe nia hetan hodi avansa nudar kandidatu PR laos vitoria deit ba PD, maibe vitoria ba povu no nasaun Timor-Leste.

Iha nia deskursu vitoria, Assanami esplika aktu konvensaun nasional dahuluk PD ne’ebe PD realiza ohin (Sabadu, red) nudar aktu ida hodi haburas demokrasia iha Timor-Leste.

banner 1000x250

“Liu hosi konvensaun nasional PD nian hatudu, PD uniku Partidu mak hatudu dalan tuir prinsipiu demokratiku,” hateten Assanami.

Ho nia kandidatura ne’ebe reprezenta PD nia promote katak wainhira eleitu ba PR sei sai ba povu Timor-Leste tomak no husu nafatin ba kuadru no militante ho simpatizante PD atu kontinua servisu hamutuk hodi hetan vitoria laos deit ba PD deit maibe ba povu Timor-Leste hotu.

Assanami reprezenta PD hodi ba kandidatura liu hosi dezisaun konvensaun nasional dahuluk PD nian. Iha konvensaun nasional ne’e Assanami eleitu hafoin Adriano do Nascimento “Loromau” retira hosi nia kandidatura hodi kompete internalmente ho Assanami.

“Ho fuan no tetu hau retira hau nia kandidatura ba PR no prontu apoiu Assanami nia kandidatura,” deklara Loromau iha Konvensaun Nasional dahuluk PD nian, Sabadu (22/1/2022), iha Salau Leokase, Raikotu, Dili.

Razaun Loromau retira hodi respeita lideransa Assanami ne’ebe durante ne’e lidera PD desde tempu ho Fernando de Araujo “La-Sama”

Ho retirada Loromau nian, automatika Assanami maka sei representa PD iha eleisaun presidensial 19 Marsu 2022.

Maski retirada, Sekretariu Jeral PD, Antonio da Conceição “Kalohan” kontinua realiza votasaun interna.

Assanami dadauk ne’e asumi kargu nudar prezidenti partidu entertantu Loromau nudar prezidenti Komite Politika Nasional partidu nian.

Partido Democratico (PD) harii iha 10 Junu 2001. Tempu ne’ebe PD lidera hosi Prezidenti (Saudozu) Fernando “La-Sama” de Araujo.

Iha nia prezensa iha eleisaun Assembleia Konstituante, PD konsege hetan kadeira 7 hafoin hetan konfiansa votos hamutu 31.680.

Iha Eleisaun Parlamentar 2007, votos PD sa’e ba 46.946 no hetan kadeira 8. Iha 2007, PD hamutuk harii Governu ho Partidu CNRT, ASDT no PSD.

Iha 2012, PD mantein hetan kadeira 8 maski sira nia votos aumenta ba 48.851 no kontinua hamutuk ho governasaun Primeiru MInistru Kay Rala Xanana Gusmão.

Maski iha 2017, votos PD aumenta 55.595 iha lideransa Mariano “Assanami” Sabino, PD tenki lakon kadeira ida hosi 8 ba 7 deit, tamba hetan deit porsentazem 9.79.

Iha 2017, PD hamutuk fali ho Partidu FRETILIN harii Governu ho lideransa PM Mari Alkatiri. Maibe governasaun ne’e to’o deit fulan 8 no Prezidenti Republika Francisco Guterres Lu-Olo tenki realiza fali eleisaun antesipada.

Iha eleisaun antisipada 2018, PD sai deit opozisaun hodi kontinua kontrola ezekusaun orsamentu jeral estadu iha Parlamentu Nasional.

Ba kandidatura Prezidenti Republika, antes ne’e PD dala tolu ona fo nia figura hodi kompete maski lakon hela deit. Figura ne’e maka Saudozu Fernando “La-Sama” de Araujo (2007 ho 2012) no Antonio “Kalohan” Conceição (2017).

Writer: SOARES, AngelinaEditor: MEILANA, Evangelisto Santos
  • Share

Leave a Reply

Your email address will not be published. Required fields are marked *

error: Content is protected !!