Asaun Karitiva GPR, Vizita Pasiente Moras Mental iha Atsabe

ATSABE, www.news-viptv.com – Hafoin simu pedidu husi autoridade lokal iha Postu Administrativu Atsabe, Munisipiu Ermera, Unidade Servisu Sosisedade Sivil Presidensia republika hamutuk ho ONG PRADET, foin lais ne’e Tersa (4/2/2025), halo vizita ba Juliao Romeiro, ne’ebe moris ho kondisaun defisente mental iha Aldeia ilat Suku Tiarlelo.

Objetivu vizita ne’e hodi hare kondisaun dereta komunidade refere no fo apoia pakote hahan ho toba nian.

Konseleira PRADET, Silvina Dulce dos Santos esplika katak iha kazu Juliao nian persiza duni halo tratamentu terapia.

Alda Moreira nu’udar Inan ho kondisaun nia oan no sei entrega nia oan ba halo tratamentu atu nune’e bele diak.

Xefi Suku Tiarlelo, Mariano Gonsalves de Araujo hateten, nia komunidade ne’e persiza duni tulun hodi halo tratamentu saude.

Ho kondisaun nia komunidade ne’e fo impaktu mos ba servisu suku nian ne’ebe tenki defende nia komunidade hodi simu deretu subsidiu ba ema defisiente nian, liliu tenki lori komunidade sira ho transporte.

Julião Romerio, idade tinan 32 nu’udar oan datoluk husi Abel António Moreira no Alda Moreira.

Durante tinan barak nia laran, Julião hela iha baraka ida ne’ebé rabat balu malu ho dapur no manu luhan, ho espasu metru kuadradu neʼebé didin ho au. Fatin ba nia atu tuur no toba nahe de’it ai kabelak la seguru ba nia nu’udar umanu. Nia kondisaun sai aat liu tan bainhira tempu udan tanba bee nalihun sulun tama ba fatin nia latan isin ba.