Apoia Adezaun ba ASEAN, Brazíl Sei fo Kapasitasaun Ba Timor-oan Sira

DILI, www.news-viptv.com  –  Nu’udar parseiru dialogu sectoral iha ASEAN, Brazil fo nia apoiu bá Timor-Leste nia adezasaun ba ASEAN ne’ebe sei ofisializa nia estatutu iha Outubru 2025, iha Kuala Lumpur, Malazia.

Nu’udar mos estadu membru Komunidade Pais Lingua Portugues (CPLP), Brazil mos sei fo apoia iha kapasitasaun ba Timoroan sira, relasiona ho adezaun ba ASEAN.

Komitmentu no apoia Brazil ne’e hato’o husi Embaixadór Brazil iha Timor-Leste, Ricardo Jo durante enkontru ho Primeiru-Ministru (PM), Kay Rala Xanana Gusmão Segunda (01/09/2025), iha Palácio do Governo, Dili,

Embaixadór ne’e sente onradu tebes tanba hetan oportunidade hodi hasoru-malu ho Primeiru-Ministru no konsege diksute hodi halo revizaun bá asuntu prinsipál balun iha relasaun bilaterál Brazil-Timor-Leste nian, ne’ebé iha hela konverjénsia.

Durante enkontru ne’e ko’alia mós kona-bá Timor-Leste nia adezaun bá ASEAN iha tempu badak nia laran ho ezijénsia no oportunidade sira ne’ebé mosu hosi ninia inkluzaun nu’udár membru plenu hosi agrupamentu rejionál ida-ne’e, no Brazil fó importánsia boot.

Tanba ne’e nia hakarak hatudu katak, ASEAN, agora daudaun maka Brazil nia parseiru komersiál bo’ot da-toluk, hafoin Xina no Estadus Unidus.

Iha oportunidade ne’e mós Embaixadór ne’e hato’o konvite hosi Prezidente Repúblika Brazil nian, Luiz Inácio Lula da Silva bá Primeiru-Ministru no líder Timor-oan sira atu partisipa iha The 2025 United Nations Climate Change Conference, or Conference of the Parties of the UNFCCC (COP-30) iha Belém iha fulan-Novembru 2025. Timor-Leste nia nomeasaun bá respetivu eskema reprezentasaun konfirmadu ona.

“Brazíl kolabora ho Timor-Leste kona-bá inisiativa kapasitasaun hodi ajusta modelu kooperasaun bazeia bá konfigurasaun polítika foun. Timor-Leste nia entrada iha ASEAN hanesan prova bá re-konfigurasaun ida-ne’e no reflete importánsia ne’ebé aumenta hosi agrupamentu rejionál ida-ne’e bá Brazíl,” Ricardo Jo Imforma.

Timor-Leste ho Brazil iha enkuadramentu amizade ne’ebé klaru tebes orientadu bá kooperasaun dezenvolvimentu entre nasaun rua.

Ezemplu maka ohin mós diksute kona-bá posibilidade sira atu estabelese kolaborasaun iha Ensinu Tékniku-Profisionál no divulgasaun Lian Portugés.