banner 1000x250

Altera Lei, PM Taur Hakarak Polisia Idade 60 Deskansa

  • Share
PM Taur Matan Ruak. Photo: Media GPM
banner 728x90

DILI. www.news-viptv.com – Primeiru Ministru (PM) Taur Matan Ruak tau ona nia programa prioridade ba instituisaun Polisia Nasional Timor-Leste (PNTL) atu fo deskansa ba polisia sira ne´ebe ho idade 60.

PM Taur Matan Ruak wainhira hasoru malu ho PR Ramos-Horta hodi relata atividade sira governu nian. Phot: Media GPM

Tamba ne´e, atu implementa nia programa ne´e, PM Taur ne´ebe asumi mos kargu Ministru Interior sei halo alterasaun lei.

banner 1000x250

“Ha’u nia prioridade mak ne’e ema ne’ebé 60 anos tenke ba deskansa, entaun tenke halo alterasaun lei para sira 60-anos deskansa para joven sira sa’e, troka, se lae ita katuas hotu la’o hotu la di’ak, hanoin mós la la’o ona, orsida problema boot ne’e, joven sira fatin la iha ne’e,” dehan PM Taur ba jornalista sira hafoin hasoru malu ho PR Ramos-Horta iha inkontru semanal hodi relata governu nia atividade, Kinta (11/8/2022).

Xefi Governu ne´e mos esplika, nia kansela rekrutamentu ba membro PNTL tambá dezenvolvimentu instuitusaun hotu-hotu inklui PNTL tenke tau matan mós ba Timor-Leste nia ekonomia.

“Se hahán uitoan, ita hatama ema barak, ne’e kualidade laiha, hahán la to’o ita problema, ita-boot sira haree kuandu ha’u Jenerál, ha’u nia planu mak ida ne’e, F-FDTL só iha tinan 20 liu mak atinje 3 mil, tinan 20 liu dezde 2001 to’o 2022 mak foin 2600, PNTL sa’e tiha ba 4 mil, depois hakarak aumenta osan, aumenta hahán, ema mesak sira de’it ka, be kiak sira iha foho ne’e ita halo nusa? Entaun la rekruta,” dehan PM Taur.

Rekrutamentu PNTL no F-FDTL, esplika PM Taur, aumenta mós tenke haree ba ameasa risku nian no nia lakohi  hatama ema, depois ba han de’it.

“Ezije saláriu de’it, ba tuur iha kazerna, labele, tenke serbisu, entaun ha’u dehan ba sira, enkuantu ha’u mak Ministru Interior, ha’u mak Primeiru-Ministru, PNTL ninia rekrutamentu laiha,” dehan PM Taur.

PM Taur hasoru malu ho PR Ramos-Horta hodi relata atividade sira governu nian, “Ne’e enkontru semanal ho Sua Eselénsia Prezidente Repúblika, ami konversa liu atividade sira Governu nian, nomós konvite sira ne’ebé ita iha, kona-ba serimónia fúnebre eis Primeiru-Ministru Japaun nian ké ita-nia País hetan konvite ida, ké ami sei haree para ita bele partisipa, nomós iha Vatikanu ke informa ba Sua Eselénsia Prezidente katak Sua Eselénsia Prezidente mós envia reprezentante ida, ita-nia Maun Boot Xanana mak ba, mas husi Governu nian mós delegasaun ida mak sei ba, depois restu ne’e konversa kona-ba situasaun ita- rai laran, kona-ba seguransa, buat hotu la’o di’ak no atividade sira pontuais sira, mas boot mak maizumenus rua ne’e de’it,”.

Writer: SARMENTO, Naomi & SOARES, PedroEditor: DOS SANTOS, Agida
  • Share

Leave a Reply

Your email address will not be published. Required fields are marked *

error: Content is protected !!