PR Ramos-Horta Simu Karta Kredensial husi Embaixador Repúblika Helénika

Dili, www.news-viptv.com – Prezidente no Laureadu Nobel ba Pás, Jose Ramos-Horta, simu karta Kredensiál husi Christodoulos Margaritis, nu’udar Embaixadór Estraordináriu no Plenipotensiáriu foun Naun-Rezidente Repúblika Helénika nian mai Timor-Leste, iha serimónia ne’ebé hala’o iha Palásiu Prezidensiál Nicolau Lobato, Tersa (16/9/2025).

Relasaun diplomátika entre Timor-Leste no Repúblika Helénika ofisialmente estabelese iha loron 4 fulan-abríl tinan 2003, liuhosi komunikadu konjuntu ne’ebé asina iha Nasoins Unidas (ONU) iha Nova Iorke.

Enkuantu envolvimentu atuál hala’o prinsipalmente liuhosi fórum multilaterál sira hanesan ONU no UE, relasaun bilaterál sira pozitivu no iha potensiál promisór ba kreximentu iha futuru.

Timor-Leste hein atu esplora kooperasaun konkreta ho Repúblika Helénika iha área xave sira ne’ebé iha interese ba malu hanesan marítima no ró, enerjia, no turizmu, ho objetivu atu hetan benefísiu hosi esperiénsia avansadu Grésia nian.

Embaixadór Christodoulos Margaritis nu’udar diplomata ida ne’ebé iha esperiénsia ho servisu durante tinan 25 resin. Espesialista ida iha lei internasionál no europeu, Embaixador Margaritis lori esperiénsia barak husi kargu xave sira iha mundu tomak, inklui serbisu nu’udar Konsul Jerál iha Hong Kong, Enviadu Espesiál ba Líbia, no Vise-Xefe Misaun nian iha Kazakistaun no Kanadá.

Nia hatene ko’alia lian Gregu, Alemaña, Inglés, no Fransés. Embaixador Margaritis simultaneamente nu’udar Embaixador Repúblika Helénika nian ba Repúblika Singapura no Sultanatu Brunei nian (naun- rezidente).

Prezidente Ramos-Horta afirma, “ita iha konfiansa katak iha ita-boot nia reprezentasaun, ita bele harii parseria ida ne’ebé metin liu, hodi esplora potensiál boot ne’ebé eziste entre ita-nia nasaun sira, partikularmente iha setór marítimu, ne’ebé importante tebes ba ita-nia nasaun rua ne’e.”

Prezidente Ramos-Horta hato’o nia konfiansa katak Embaixadór foun nia esperiénsia ne’ebé boot sei kontribui maka’as liután ba aprofunda relasaun bilaterál entre Timor-Leste no Helénika.