Federasaun Jinastiku Sai Membru Foun CONTL

DILI, www.news-viptv.com –  Comite Olimpiku Nasional de Timor-Leste (CONTL) iha nia Assembleia extra-ordinariu simu tan Federasaun Jinastiku de Timor-Leste nu’udar membru foun, Sabadu (26/8/2023), iha JL Villa Dili.

Prosesu rekonesementu Federasaun Jinastika ne’e halo liu hosi votasaun hosi membru CONTL sira ne’ebe fo votos afavor hotu.

Prezidenti CONTL, Francisco Kalbuadi Lay hateten CONTL kontenti tamba bele simu tan Federasaun Jinastika nu’udar membru foun.

“Kontenti simu tan federasaun jinastika nu’udar membru foun,” komentariu Francisco Kalbuadi ba jornalista hafoin assembleia extra-ordinariu ne’e.

Francisco Kalbuadi Lay esplika, Assembleia ne’e nu’udar programa CONTL ne’ebe kada tinan sempre realiza hodi hare estatutu no assuntu importante balun.

Iha Assembleia extra-ordinariu ne’e, alende simu membru foun, CONTL mos halo revisaun ba estatuta inklui halo logo foun ba CONTL.

Iha revisaun ne’e, membru CONTL tomak aseita hodi muda estatuta no aprova logo foun CONTL nian ne’ebe ho modelu Bandeira Timor-Leste ho kabuar 5 nudar reprezentasaun kontinenti lima.

Assembleia Extra-Ordinariu CONTL ne’e mos hetan prezensa hosi Ministru Juventude, Desporto, Arte no Kultura, Nelyo Isaac Sarmento ne’ebe konsege partispa to’o remata.

“Hau hanoin programa ne’e diak tebes tamba bele ajuda sira nia organizasoes ne’e rasik, nune’e waihira sira hasoru problema ruma, sira bele resolve tuir mekanismo organizasoes nian, bele mos lori joven sira nia direitu hanesan atleta ba nasaun seluk,” dehan Ministru Nelyo Isaac.

Prezidenti Federasaun Jinastika Timor-Leste, Maria Amelia durante ne’e federasaun halo ona nia programa lubuk ida, inklui oinsa fo formasaun jinastikaba estudante sira.

“Hanesan Federasaun foun ami foin halo iha tinan rua liu ba no hetan vizita husi federasaun Japaun hodi fo formasaun ba eskola hotu iha Municipio Dili ho total estudante hamutuk 100 mak hetan ona formasaun Jinastika nian,” hateten Maria Amelia ba jornalista.

Iha nia implementasaun programa, federasaun mos halo koperasaun ho RTTL, EP hodi publika programa jinastika nian.

Membru CONTL sira ne’ebe partisipa iha Assembleia ne’e maka Boxing, Cycling, Football, Table Tennis, Tenis, Taekwondo, Trialthlon, Ski, Shooting, Sailing, Badminton, Handball, Hockey, Aquatic, Athletic, Karate-do, Judo, Roller, Pentathlon, Woman Commission, Weightlifting, no Athete Commission.