Povu Timor-Leste Vota ba Prezidenti Republika Foun

DILI, www.news-viptv.com – Povu Timor-Leste iha 19 Marsu, Sabadu ohin fo ona sira nia dever nudar sidadaun hodi fo votos ba kandidatu prezidenti republika nain 16 ne’ebe kompete iha eleisaun prezidensial.

Sekretariadu Tekniku Administrasaun Eleitoral (STAE) nudar instituisaun estadu nian ne’ebe responsabiliza ba realizasaun eleisaun prezidensial hahu loke sentru votasaun sira iha tuku 7 dadersan no taka iha tuku 3 lokoraik.

Tuir publikasaun STAE iha jornal da republika kona ba numeru eleitor elijivel ne’ebe sei fo nia voto hamutuk 859.613. (rihun atus walu lima nolu resin sia no atus nen sanulu resin tolu)

Observasaun ekipa VIPTV iha sentru votasaun sira lao hakmatek no hetan seguransa hosi Polisia Nasional Timor-Leste. Alende ne’e hetan mos observasaun hosi observador nasional no internasional sira.

Iha eleisaun prezidensial tinan ne’e, hamutuk iha kandidatu prezidenti republika nain 16 nebe kompete hanesan Isabel Ferreira, Hermes Barros, Angela Freitas, Rogerio Lobato, Anacleto Pereira, Francisco Guterres Luolo, Milena Pires, Lere Anan Timur, Armanda Berta, Antero Benedito, Constancio Pinto, Virgilio Guterres, Martinho Gusmao, Jose Ramos Horta, Felisberto Duarte no Mariano Assanami Sabino.