Ramos Horta Uniku Naran Ne’ebe Deskuti iha Konferensia Nasional CNRT

DILI, www.news-viptv.com – Maski sedauk remata, naran premeadu Nobel da Paz, Jose Ramos Horta uniku naran ne’ebe deskuti iha konferensia nasional Partidu CNRT.

Diskusaun naran Ramos Horta iha konferensia ne’e lidera deretamente hosi Prezidenti Partido Congresso Nacional de Recontrução do Timor (CNRT), Kay Rala Xanana Gusmão hodi husu opiniaun no hanoin hosi delegadu sira.

Tuir ajenda hafoin almosu, Partidu CNRT sei deklara offisialmente kandidatura Prezidenti Republika nian ne’ebe “Posibilidade” sei apoiu ba Jose Ramos Horta.

Antes ne’e iha eleisaun prezidensial 2007, Partidu CNRT liu hosi Xanana Gusmao fo bensaun tula liman ba Ramos Horta no eleitu ba Prezidenti Republika.

“Tula Liman” ne’ebe Xanana Gusmão fob a kandidatura sempre hetan vitoria iha kualker eleisaun prezidensial, inklui Jose Ramos Horta rasik mos iha tinan 2007 eleitu ba Prezidenti Republika hafoin simu “Tula Liman” hosi Xanana.

Alende Jose Ramos Horta, figura seluk ne’ebe hetan benefisiu “Tula Liman” Xanana nian maka Taur Matan Ruak iha tinan 2012 no Francisco Guterres “Lu-Olo” iha 2017.

Demokratikamente Timor-Leste hafoin restaura nia independensia iha 20 Maiu 2002 halao ona eleisaun prezidensial dala haat hahu iha tinan 2001 ne’ebe Xanana Gusmã rasik mak eleitu ba Prezidenti Republika hafoin kompete ho Proklamador Francisco Xavier do Amaral.

Iha eleisaun prezidensial tinan ne’e, iha ona kandidatu nain 4 maka deklara offisialmente nia kandidatura maka atual Prezidenti Republika, Francisco Guterres “Lu-Olo”, Armanda Berta, Dr. Martinho Gusmaõ, no Angela Freitas.

Entertantu Tanente Jeneral Lere Anan Timur ne’ebe nia karta hetan ona ezonerasaun hosi kargu Xefi Estadu Maior Jeneral Forsa Armadas F-FDTL iha loron hirak liu ba mos sei avansa nudar kandidatu prezidenti republika.

Alende ne’e iha mos naran Milena Pires no Virgilio Guterres ne’ebe prepara hela sira nia deklarasaun kandidatura.