Liquiçá, wwnews-vip.com — Forsa Konjunta Timor-Leste preende kaixa 50 bebida enerjiamarka KRATINGDAENG no aimoruk herbal ne’ebé suspeita viola regulamentu aduaneiru, durante operasaun fiskalizasaun veíkulu iha Rotunda Tibar, Suku Tibar, Postu Administrativu Bazartete, Munisípiu Liquiçá, iha Domingu, 25 Outubru 2026.
Operasaun ne’e hala’o iha tuku 14:30, oras lokál, liuhusi atividade auto-stop ka pasa-revista ba veíkulu públiku no privadu ne’ebé liu iha área refere, ho objetivu atu prevene no kombate atividade kontra-bandu no asegura kumprimentu ba lei no regulamentu aduaneiru iha Timor-Leste.
Durante operasaun, ekipa konjunta detekta bebida asukaradu marka KRATINGDAENG ho totál kaixa 50, ne’ebé transporta iha kareta Mitsubishi Triton ho matríkula A.26.140 TL. Ekipa ne’e mós detekta aimoruk herbal ne’ebé transporta iha kareta marka Cary ho matríkula C.12.048.
Tuir informasaun ne’ebé fó sai, merkadoria hirak-ne’e lori husi Munisípiu Bobonaro atu ba Dili. Suspeita kona-ba kumprimentu ba prosedimentu importasaun sai razaun ba apreensaun no prosesamentu tuir prosedimentu legál.
Depois de apreensaun, evidénsia sira aprezenta ba Komandu PNTL Munisípiu Liquiçá atu hala’o prosesu identifikasaun no rejistu kazu. Kazu kona-ba bebidaenerjia Kratingdaeng rejista ho númeru NUC: 0096/26.LIZBT, enkuantu kazu kona-ba aimoruk herbal rejista ho númeru NUC: 0097/26.LIZBT.
Autoridade sira informa katak aimoruk herbal ne’e la iha dokumentu importasaun legál ne’ebé presiza atu tama iha Timor-Leste, ne’ebé konsidera suspeita violasaun ba regra no prosedimentu aduaneiru.
Operasaun ne’e envolve instituisaun oioin, inklui Autoridade Aduaneira (AA), Direksaun Servisu Investigasaun Kriminál (DSIK), Direksaun Servisu Informasaun Polísia (DSIP) husi Polísia Nasionál Timor-Leste (PNTL), Polísia Sientífika Investigasaun Kriminál (PCIC), Servisu Nasionál Intelijénsia Estratéjiku (SNIE), membru D2 husi FALINTIL–Forsa Defeza Timor-Leste (F-FDTL) no S2 husi Unidade FALINTIL.
Depois de remata apreensaun, ekipa konjunta entrega evidénsia no suspeitu sira ba Komandu PNTL Munisípiu Liquiçá atu kontinua prosesu identifikasaun no prosedimentu legál. Kazu ne’e sei tuir prosesu kompeténsia autoridade judisiária, inklui Ministériu Públiku no Tribunal, atu analiza no foti desizaun tuir lei ne’ebé vigora.
Forsa Konjunta afirma katak sei kontinua hametin koordenasaun no kolaborasaun entre instituisaun kompetente sira atu intensifika fiskalizasaun, prevene atividade kontra-bandu no asegura kumprimentu ba lei no regulamentu aduaneiru iha Timor-Leste.
Fonte: MediaPNTL
