Passporte Expire, Deputada PLP Husu Governu Rezolve Estudante Timoroan iha Portugal

DILI, www.news-viptv.com – Relasiona ho pasporte Bolseiros Timoroan sira ne’ebe estuda iha Portugal ne’ebe expire ona no persiza renovasaun, Deputada Bankada PLP, Maria Angelina Sarmento husu ba ministerium kompotente atu resolve assuntu refere.

Iha Plenaria Parlamentu Nasional, Tersa (21/4/2026), Depada ne’e Husu ba Ministériu Negósiu Estranjeiru no Kooperasaun (MNEK) hamutuk ho Embaixada Timor-Leste iha Portugál atu buka mekanizmu ne’ebé lalais hodi renova pasaporte ba estudante sira ne’ebé remata ona estudu maibé sira-nia dokumentu expira ona.

Estudante sira hato’o ona pedidu ba Embaixada no Adidu Edukasaun maibé seidauk iha resposta, buat ne’e difikulta sira-nia prosesu atu fila mai rai-moris Timor-Leste.

“Hau mos simu imformasaun ida husi estudante bolseiru husi FDCH nebé estuda iha portugal, sira nia estudu termina ona, atu fila fali mai Timor-Leste, maibé sira nia pasaporte mate, no expira ona iha tempu hanesan, sira nia bolsa mos termina ona,” levanta Deputada ne’e.

Iha nia intervensaun, deputada PLP ne’e mos koalia kona ba Rehabilitasaun Irigasaun Wenoren (Laleia), ne’ebe ​Bankada PLP husu ba Ministru Agrikultura atu fó atensaun sériu ba Despaxu Primeiru-Ministru, Kay Rala Xanana Gusmão, iha Fevereiru 2025. Despaxu ne’e bazeia ba pedidu husi komunidade Laleia Anan atu hadi’ak irigasaun Wenoren ne’ebé kotu. To’o ohin loron, seidauk iha asaun konkreta husi Ministériu, ne’ebé rezulta populasaun lamenta tebes tanba labele kontinua sira-nia atividade agríkola/halai natar.

​Nune’e mos ba assuntu Realokasaun Restus Mortais iha HNGV, ​Bankada PLP husu ba Ministériu Asuntu Kombatentes Libertasaun Nasionál (MACLN) atu halo kordenasaun ne’ebé di’ak ho família sira molok halo realokasaun ba restus mortais na’in-15 ne’ebé dadaun ne’e iha HNGV atu lori ba Jardim Eróis da Pátria, Metinaro. Kordenasaun ne’e importante tebes atu evita desentendimentu no mós nu’udar forma ida hodi fó rekoñesimentu ne’ebé dignu ba ita-nia erói sira.