Iha Fosil Ichthyosaurus, Timor-Leste Sei Husu UNESCO Rekonese Lesululi Sai Global Geo Park

CAILACO, www.news-viptv.com – Prezidente Repúblika, J. Ramos-Horta, iha 8 Abril halo vizita direta ba foho Lesululi, Postu Administrativu Cailaco, Munisípiu Bobonaro, hodi haree fósil reptíl marinu ida ne’ebé identifikadu ona hanesan Ichthyosaurus, ne’ebé konsidera mós ho idade liu ona tinan millaun 208.

Fósil ne’e, tuir informasaun sientífika, konsidera nu’udar patrimóniu jeolójiku importante ida ba Timor-Leste. Vizita ne’e refleta interese Estadu nian hodi promove investigasaun sientífika no konservasaun patrimóniu naturál ba ita-nia rain Timor-Leste.

Durante vizita, Prezidente subliña katak deskoberta ne’e bele sai pontu estratéjiku ida ba dezenvolvimentu turizmu sientífiku no edukativu, liu-liu iha Munisípiu Bobonaru. Nia mós husu atu entidade relevante sira kontinua halo estudu kle’an hodi garante konservasaun no aproveitamentu sustentável ba futuru.

Iha okaziaun ne’e, Vise-Prezidente Institutu Jeosiénsia Timor-Leste (IGTL), Eng. Victor Aleluia de Sousa Vicente, hateten katak atu halo kobertura dokumentáriu ida kona-ba fósil ne’e, ho planu atu publika iha 2028, hodi promove Cailaco no Timor-Leste ba nível internasionál.

Nia mós hateten katak inisiativa tuirmai mak atu lori sítiu fósil ne’e hodi hetan rekoñesimentu nu’udar UNESCO “Global Geopark”, maski prosesu ne’e la fásil. Maibé, se rekoñese, bele atrai turista no investimentu no dinamiza ekonomia lokál hanesan alojamentu, restaurante no otelaria.

Entretantu, jeologista Isaias dos Santos Barros, ne’ebé deskobre fatin fósil ne’e, sei kontinua servisu hamutuk ho péritu sira atu prepara artigu sientífiku ida ho kualidade ba publikasaun iha jornál internasionál, hodi hasa’e importánsia sientífika husi deskobrimentu fósil refere.