Xanana “Tula Liman” ba Ramos Horta Nudar Kandidatu PR Hosi CNRT

DILI, www.news-viptv.com – Prezidenti Partido Congresso Nacional de Recontrução do Timor (CNRT), Kay Rala Xanana Gusmão “Tula Liman” ona ba Jose Ramos Horta nudar kandidatu Prezidenti Republika (PR) hosi CNRT nian hodi kompete iha Eleisaun Prezidensial 19 Marsu 2022.

Bensaun “Tula Liman” ba Ramos HOrta ne’e desidi liu hosi Konferensia Nasional Partidu CNRT nian ne’ebe halao ohin (Domingu) iha Salaun Oka Rudal 7984, Surik Mas, Dili.

Desizaun Konferensista sira nian bazeia ba konfiansa katak Dr. JRH maka kandidatu ne’ebe prienxe duni rekizitu sira ne’ebe CNRT hatuur ona. Rekizitu sira ne’e maka hanesan:

1. PR eleitu komprometidu atu respeita no halo tuir deit saida maka Konstituisaun RDTL haruka;

2. PR eleitu komprometidu atu hatuur fali orden konstitusional ne’ebe politiku má-fé sira sobu no estraga tiha ona;

3. PR eleitu komprometidu atu hatuur hikas lejitimidade no dignidade orgaun Parlamentu Nasional ne’ebe partidu ambisiozu sira halo Asaltu Poder hodi sobu orgaun ida ne’e iha 19 Maiu 2020;

4. PR eleitu komprometidu atu restaura fali lejitimidade no funsionamentu normal orgaun Governu ne’ebe dezde 2020 la-funsiona ho normal ne’ebe rezulta ekonomia rai laran hakdasak ba beibeik;

5. PR eleitu komprometidu atu halo reforma iha setor judisiariu nune’e bele garante no asegura aplikasaun Lei no Orden, liu-liu bele garante justisa tuir Konstituisaun no Lei sira haruka;

6. PR eleitu komprometidu atu lahalo Prezidensia Republika sai fali opozisaun ba Governu, nune’e Governu tuir mai bele atinje estadu tomak nia objetivu atu dada Kadoras Greater Sunrise mai Timor-Leste;

Hafoin deside Dr. JRH sai kandidatu husi CNRT nian, Delgadu sira ne’ebe tuir Konferensia komprometidu atu halo esforsu hodi garante Dr. JRH eleitu sai PR ba periodu 2022-2027.

 “Tula Liman” ne’ebe Xanana Gusmão fob a kandidatura sempre hetan vitoria iha kualker eleisaun prezidensial, inklui Jose Ramos Horta rasik mos iha tinan 2007 eleitu ba Prezidenti Republika hafoin simu “Tula Liman” hosi Xanana.

Alende Jose Ramos Horta, figura seluk ne’ebe hetan benefisiu “Tula Liman” Xanana nian maka Taur Matan Ruak iha tinan 2012 no Francisco Guterres “Lu-Olo” iha 2017.

Demokratikamente Timor-Leste hafoin restaura nia independensia iha 20 Maiu 2002 halao ona eleisaun prezidensial dala haat hahu iha tinan 2001 ne’ebe Xanana Gusmã rasik mak eleitu ba Prezidenti Republika hafoin kompete ho Proklamador Francisco Xavier do Amaral.

Iha eleisaun prezidensial tinan ne’e, iha ona kandidatu nain 4 maka deklara offisialmente nia kandidatura maka atual Prezidenti Republika, Francisco Guterres “Lu-Olo”, Armanda Berta, Dr. Martinho Gusmaõ, no Angela Freitas.

Entertantu Tanente Jeneral Lere Anan Timur ne’ebe nia karta hetan ona ezonerasaun hosi kargu Xefi Estadu Maior Jeneral Forsa Armadas F-FDTL iha loron hirak liu ba mos sei avansa nudar kandidatu prezidenti republika.

Alende ne’e iha mos naran Milena Pires no Virgilio Guterres ne’ebe prepara hela sira nia deklarasaun kandidatura.