Wang Wenli Embaixadora foun Xina ba Timor-Leste

Embaixadora Wang Wenli troka nia sessante, Xiao Jiangou ne’ebe remata ona nia mandatu iha fulan hirak liu ba durante halao misaun diplomata hodi reprezenta Governu Xina.

Relasaun bilaterais entre Timor-Leste ho Xina hahu kedan iha tinan 2000 wainhira Timor-Leste iha hela governasaun ONU nia lideransa liu hosi estabelesementu nia edifisiu no offisialmente hahu wainhira Timor-Leste hetan nia restaurasaun independensia iha 20 Maiu 2002.

Iha relasaun bilateral ini, Xina apoiu konstrui edifisiu Palasiu Prezidensial ne’ebe dadauk ne’e sai palasiu ba knar xefi estadu. Alende ne’e Xina mos apoiu tan kontrusaun edifisiu Ministeriu Negosiu Estranjeiru no Koperasaun, inklui ikus edifisiu ba Ministeriu Defeza no Kuartel Jeral F-FDTL.

Relasaun entre illa Timor no Xina mai husi komérsiu ai-kameli husi Xina molok misionáriu no esploradór portugés sira to’o iha tasi-ibun illa Timor nian iha sékulu XV. Iha sékulu XVIII Ilha Timor rejista prezensa xineza dahuluk.

Iha istória modernu, Repúblika Populár Xina nu’udar membru úniku Konsellu Seguransa nian ne’ebé fó apoiu ba Proklamasaun Unilaterál Independénsia Timor-Leste nian iha loron 28 Novembru 1975. Xina sai hanesan nasaun ida-ne’ebé estabelese relasaun diplomátika primeiru ho Timor-Leste iha fulan Maiu 2002.

Hahú husi tempu ne’ebá, governu Xina kompromete ona liu husi CNY743.1 milhoens ba Timor-Leste iha forma subsídiu sira hahú husi harii infraestrutura governu nian to’o fornese sasán no ekipa médiku sira dezde 2003.

Iha pandemia COVID-19, inundasaun no rai-halai ne’ebé estraga parte balun husi nasaun ne’e, governu Xina entrega doze 100,000 husi vasina SINOVAC, siringe, hena, ekipamentu teste, ventiladór, dolar millaun ida ba Sekretáriu Estadu Protesaun Sivíl no buat seluk tan.

Hahú husi Junu 2022, Timor-Leste simu vizita nivel aas rua husi Repúblika Populár Xina, Konselleiru Estadu no Ministru Negosius Estranjeirus, S.E. Wang Yi, no Asistente Ministru Negosius Estranjeirus, S.E. Nong Rong.

Haree ba istória naruk, amizade, no parseria entre Timor-Leste no Repúblika Popular Xina, iha okaziaun vizita Primeiru-Ministru Timor-Leste, S.E. Kay Rala Xanana Gusmão foin lalais ne’e, nasaun rua ne’e konkorda atu hahú negosiasaun kona-ba Akordu Kuadru Estratéjiku Komprehensivu ida atu hasa’e dezenvolvimentu ba benefísiu nasaun rua ne’e no povu sira.

Timor-Leste fiar katak nomeasaun Embaixadóra Wang Wenli nian sei hametin no lori ba nivel aas liu tan kooperasaun no amizade ne’ebé eziste entre nasaun rua ne’e.