DILI, www.news-viptv.com – Governu iha nia politika ba toponomia no organizasaun, forma ona ekipa konjuta hosi instituisaun governu sira hodi implementa lei ba publiku atu kumpri.
Liu hosi konferensia imprensa, Sekretariu Estadu Toponomia no Organizasaun Urbana, Germano Dias esplika ekipa konjuta ba MOSS ne’e forma hosi Ministeriu Administrasaun Estatal, Minesteriu Interior, Ministeriu Defeza, Ministeriu Turismu no Ambiente, Ministeriu Transporte no Telekomunikasaun, PNTL, F-FDTL, Bombeiros no Autoridade Munisipiu sira.
Iha konferensia imprensa ne’e, membru governu ne’e avisa ba komunidade sira iha Kapital Dili liliu sira ne’ebe hela iha parte mota ninin Comoro no Tasi Ibun Bebonuk atu hamamuk fatin, inklui komunidade sira hela pertense ba Bidau to’o Cristo Rei no okupa trotoar parte tasi ibun atu bele hamamuk fatin refere, hodi bele fasilita ema lao ain.
Sekretariu estadu ne’e xamada hikas ba vendedor ambulante sira iha munisipiu hothotu sei la autoriza tan halo negosiu iha Estrada ninin, exeptu iha merkadu ne’ebe governu prepara ona, no mos la autoriza vendor sira hela iha merkadu no fo aluga tutan ba ema seluk, inklui ba vendor kareta sira labele ona uza espasu publiku ne’ebe estadu nian hodi fan kareta ho motor.
Ba komunidade sira ne’ebe hakiak animal, governu la autoriza ba komunidade sira ne’ebe hakiak iha area nakonu ho populasaun. Apela seluk ne’ebe hato’o mos ba komunidade bandu atu labele halo festa tuir ida-idak nian hakarak no uza Estrada publiku ba liu ia mate no moris nian.