TL Kompleta ona 72,7 % Vasina Doze 2

DÍLI, www.news-viptv.com – Ministerio Saude (MS) iha nia evalusaun ba Prevensaun Vasina (PV) hasoru Surtu COVID-19 informa Timor-Leste ohin loron atinji ona vasina kompletu (doze 2) ho porsentazem 72,7%.

Kordenador Jeral Surtu COVID-19, Dr. Odete da Silva Viegas iha komunikadu imprensa ne’ebe publika loron 27 Marsu 2022 hateten,ba populasaun iha Timor-Leste laran tomak, maski simu ona vasina, favor respeita nafatin regra prevensaun no ijiéne individual, ne’ebé Governu hatuur ona, atu prevene moras COVID-19 da’et ba mai.

“Regra sira ne’e, hanesan ita hotu hatene ona, maka Uza mascara, Fase liman bebeik ho sabaun ka uza dezinfetante ruma, Evita kose liman ba matan, inus ho ibun, Wainhira kumprimenta malu lapresiza kaer liman, bensa-liman, rei-malu ka hakuak malu, Evita halibur malu barak, Hamriik ka tuur dook husi ema seluk mínimu metru ida ho balun, hateten dra. Odete Viegas.

Nia mos esklarese, ema ne’ebé tama husi estranjeiru ho vasina dala rua (2) ou kompleta, hein depois 48 oras teste PCR negativo mak foin bele la’o livre, no ba sira, ne’ebe vasina dala 1 ou la kompleta no mós ba sira ne’ebe sedauk vasina sei halo karantina to 14 dias hafoin teste PCR negativo mak foin sai no la’o livre.

“Ema ne’ebé mai husi estranjeiro tantu via Aereo, Terestre no Marítima sei halo teste imediata iha pontu entrada hafoin 24 oras ba 48 oras ho rezultadu teste PCR negativu maka bele la’o livre,” hateten dra. Odete Viegas.

Nia esplika tan, ba sira nebe’e vasina dala 1 ou la kompleta, nomós ba sira ne’ebé sedauk simu vasina sei halo kuarentena obrigatoriamente to loron 14 hafoin teste PCR negativu no sei simu sertifikadu livre kuarentena maka foin sai no la’o livre.

Alende hato’o progressu ba vasinasaun, iha komunikadu ne’e mos mensiona kona ba evolusaun surtu COVID-19 iha Timor-Leste ne’ebe ho kazu hanesan; Kazu detetadu foun 0,  Rekuperadu 1, Kazu Ativu 13, Komulativu Kazu Total 22821, Óbitu 0, Totál Óbitu iha Timor-Leste 130, Munisípiu 10 laiha kazu ativu & munisípiu 1, Kapitál Díli ho RAEOA sei iha kazu esporádiku.

Tuir Informasaun husi Ospitalizasaun Izolamentu Vera Cruz, Lahane, Hospital Nasional Guido Baladares (HNGV), no fatin seluk iha territóriu laran tomak, halo tratamentu ospitalizadu ba kazu detetadu pozitivu hamutuk:2 (Izolamentu Vera Cruz). Baixa ho COVID-19 iha nain 2.

‘’Hato ba públiku katak, Wainhira sente moras isin-manas, me’ar, kakorok moras ka sintoma seluk tan: bele ba konsulta iha Sentru Saúde ka ospitál ne’ebé besik, atu bele halo swab no ba sira ne’ebe iha Dili bele mai direita iha CCD husi loron segunda to’o domingu, dadeer 08:00 – 12:00 no loraik hahu 14:00 – 17:00. Wainhira sente katak sai kontaktu besik ho kazu pozitivu ka 𝐶𝑜𝑛𝑡𝑎𝑐𝑡 𝑡𝑟𝑎𝑐𝑖𝑛𝑔 sei halo teste imediatamente iha fatin ne’ebé determina ona no karik rezultadu PCR negativu sei halo kuarentena ka Autokuarentena obrigatóriu durate loron 7 hafoin repete fali teste no husi resultado PCR karik negativu hafoin bele la’o livre’’ dra Odete apela komunidade liu hosi komunikadu ne’e.

Husu ba publiku ne’ebé maka atu trata dokumentu ba Auto-izolamentu tenke hatama karta pedidu auto-izolamentu nian ba iha Ministériu Saúde no dirije ba Diretóra Jerál Saúde/Kordenadóra Jerál Surtu COVID-19 nian hafoin hetan verifikasaun ba fatin no aprova husi Pilar 7. Ba sira ne’ebé halo auto-izolamentu no la hatudu sintomas ka asintomatiku sei izola an durante loron 10 no sei hetan sertifikadu livre ba auto-izolamentu nian husi pilar 7, no ba sira ne’ebé hatudu sintomas ka asintomatiku depois loron 10 sei aumenta tan loron 3 hafoin hetan serfikadu no livre husi auto-izolamentu.

“Apela ba populasaun iha Díli laran no mós iha Munisípiu sira seluk, atu aprezenta-an iha fasilidade saúde (Sentru Saúde ka Ospitál) ne’ebé besik, wainhira sente isin-manas, kakorok moras, inus-ben, ka mear, hodi bele hetan atendimentu husi profisionál saúde sira. Wainhira sedu liu hatene se virus ne’e kona ita ka la’e, di’akliu 𝑝𝑟𝑒𝑣𝑒𝑛𝑒 𝑡𝑎𝑚𝑎 𝑏𝑎 𝑖ℎ𝑎 𝑠𝑖𝑡𝑢𝑎𝑠𝑎𝑢𝑛 𝑛𝑒’𝑒𝑏𝑒 ℎ𝑎𝑛𝑎𝑟𝑎𝑛 𝑠𝑖𝑛𝑑𝑟𝑜𝑚𝑎 𝑖𝑛𝑠𝑢𝑓𝑖𝑠𝑖𝑒𝑛𝑠𝑖𝑎 𝑟𝑒𝑠𝑝𝑖𝑟𝑎𝑡𝑜𝑟𝑖𝑎 𝑎𝑔𝑢𝑑𝑎 (𝑆𝐼𝑅𝐴), 𝑘𝑎 𝑠𝑢𝑠𝑎𝑟/𝑑𝑖𝑓𝑖𝑠𝑖𝑙 𝑎𝑡𝑢 𝑑𝑎𝑑𝑎-𝑖𝑖𝑠,” dehan dra. Odete.