TL – EUA Asina Akordu Troka Rai no Propriedade Diplomatiku

Díli, www.news-viptv.com – Governu Timor-Leste (TL) no Estadu Unidos Amerikanu (EUA) asina akordu troka rai no propriedade diplomatiku sira ba tempu naruk entre Governu Timor-Leste no Estadus Unidus Amérika.

Ba nasaun-rua ne’e nian, entre Governu Timor-Leste reprezenta hosi Ministru Justisa, Tiago Amaral Sarmento no hosi Estadu Unidus Amérika reprezenta hosi ninia Enkarregadu Negósiu, Tom Daley, no asina akordu ne´e hetan testamuna hosi Ministra Negosiu Estranjeiru no Kooperasaun, Adaljiza Magno, Sexta (12/8/2022), iha Edifisu MNEK, Pantai Kelapa Dili.

Akordu hirak ne’e asina mós iha Nova Iorke husi Embaixadór Timor-Leste ba Estadus Unidus, Isílio Coelho no Timor-Leste nia reprezentante ba ONU, Embaixadór Karlito Nunes.

Akordu refere ho konteúdu katak hosi EUA fó rai no uma rua ne’ebé prontu utiliza bá TL iha Washington no Nova Yorke hodi utiliza bá TL ninia embaixada, nune’e mós TL oferese rai no uma bá EUA ninia embaixada iha TL ho gratuita durante períodu tinan 50 no sei extende tinan 50.

“Parte rua sei la selu arrendamentu rai no uma ne’ebé uza,” dehan Ministru Justisa, Tiago Amaral Sarmento bá jornalista sira, hafoin asina akordu iha ho EUA.

Enkarregadu Negósiu EUA iha TL, Tom Daley hateten, akordu ne’e hatudu EUA nia kompromisu forte iha relasaun amizade ho Timor-Leste.

“Valor rai ne’ebé iha hanesan de’it ho ida ne’ebé TL fó ba EUA iha Díli,” Tom Daley hateten.

Serimonia ne’e hetan partisipasaun mós hosi Vise Ministru Juliäo da Silva, Sekretáriu Jerál MNEC, Embaixadór Francisco Cepeda, entidades hosi instituisaun relevantes no hala’o iha Salão Nobre-MNEC.