banner 1000x250

Timor-oan iha NTT Konsidera Festival Fronteira 2023 Haforte Relasaun Amizade

  • Share
PR Ramos-Horta wainhira loke seminariu no dialogu iha Festival Fronteira 2023 ne'ebe realiza iha Maliana. Foto: VIP TV / Lucitania Barreto
banner 728x90

MALIANA, www.news-viptv.com  – Timor-oan sira ne’ebe hela iha Nusa Tenggara Timur (NTT) hare no konsidera katak realizasaun Festival Fronteira 2023 ne’ebe realiza hosi Governu Timor-Leste haforte relasaun amizade entre Timor-oan hotu iha Ilha Timor.

Elvis Domingos Pedroso nu’udar Timor-oan ne’ebe hela iha NTT, maski politikamente sira nia inan-aman hili hodi sai sidadaun Indonezia hafoin referendum iha tinan 1999, nia hateten, nu’udar Timor-oan iha hanoin nafatin atu oinsa sira mos hakarak hametin ligasaun Timor-Leste ho Indonezia hodi fo diak ba jerasaun foun.

Koordenador Delegasaun Timor-oan NTT, Felisberto Amaral foto hamutuk ho PR Horta, Sekretariu Estadu Arte no Kultura, Jorge Cristovão no Bupati Belu, Agustinus Taolin iha loron dahuluk seminariu no dialogu Festival Fronteira 2023 ne’ebe realiza iha Maliana. Foto: Media GPR

“Festival Fronteira ne’e hanesan tempu osan mean ba nasaun rua, Timor-Leste no Indonezia. Atividade hanesan ne’e la bele para iha ne’e deit, maibe nafatin kontinua hodi hametin liu tan unidade no amizade husi nasaun rua ne’e. Maske ami hela iha Indonezia diak ona, maibe ami jerasaun Timor-Leste nian nafatin,” hateten Elvis ba jornalista VIP-TV Kinta (16/11/2023), iha Ginaziu Desportu Maliana.

Koordenador Delegasaun Timor-oan iha NTT, Felisberto Amaral, Festival Fronteira ne’e pozitivu ba povu rai rua, liliu jovem Timor-oan sira ne’ebe hela iha Timor-Leste no Timor Osidental (NTT).

Tamba ne’e, nia esplika, atu hametin unidade, dame no amizade entre Timor-oan sira, governu rai rua (TL: ho Indoenzia, red) tenki halo duni atividade ne’ebe involve jovem sira, liliu iha area fronteira.

“Governo Indonezia no Governo Timor-Leste hahu tiha ona amizade, entaun joven sira mos tenke kria amizade ba malu, liliu iha linas fronteiras hanesan iha evento Festival Fronteira ne’e rasik Timor-oan sira mai hosi Kupang, Atambua, Betun, no Kefa nune’e ita kria amizade no ambiente diak,” dehan Felisberto Amaral.

Prezidente José Ramos-Horta iha semináriu no Dialogu Festival Fronteira 2023 nian hateten Festivál Fronteira ne’e hanesan inisiativa troka kulturál ida ho objetivu atu hametin rekonsiliasaun entre Timor-Leste no Indonézia ne’e importánte ba rekonsiliasaun nian hodi promove futuru ida-ne’ebé pasifika no prospéru ba nasaun rua ne’e.

“Rekonsiliasaun la’ós kona-ba haluha pasadu. Ita hakarak aprende husi ita-nia istória no uza ida-ne’e nu’udar baze atu harii futuru ne’ebé di’ak liu ba ita-nia povu,” dehan PR Horta iha nia deskursu.

Festival Fronteira 2023 ne’e realiza hahu 15 to’o 19 Novembru, hetan partisipasaun mos hosi joventude no grupu kultura hosi Munisipiu Covalima, Bobonaro no Dili.

Festival Fronteira ne’e realiza hosi Ministeriu Juventude, Desportu, Arte no Kultura, Sekretaria Estadu Arte no Kultura ho Centro Nacional Chega, I.P ho objetivu ida deit katak promove rekonsiliasaun no hametin unidade no fo liman ba malu no kria amizade entre povu Timor-Leste ho Indonezia.

  • Share

Leave a Reply

Your email address will not be published. Required fields are marked *

error: Content is protected !!