Timor-Leste ho Xina Sei Asina Kooperasaun Ekonomia Digital no Investimentu iha Dezenvolvimentu Verde

DILI, www.news-viptv.com – Hodi hasa’e desenvolvimentu ekonomia, Timor-Leste iha nia kooperasaun bilateral ho Xina sei asina akordu kooperasaun kona ba ekonomia digital no investimentu iha desenvolvimentu verde.

Akordu kooperasaun ne’e sei asina husi Vise Primeiru Ministru Francisco Kalbuadi Lay nu’udar mos Ministru Koordenadro Assuntu Ekonomia no Ministru Turismu no Ambiente ne’ebe poder tomak ba asina kooperasaun ne’e desidi ona liu hosi sorumutuk Konsellu Ministrus iha Kuarta (17/7/2024, iha Palacio do Governo, Dili.

Iha komunikadu imprensa ne’ebe governu publika, Vise-Primeiru-Ministru, Francisco Kalbuadi Lay, simu mós poder tomak hodi asina akordu ho Ministériu Komérsiu Repúblika Populár Xina hodi Reforsa Kooperasaun Investimentu iha Ekonomia Dijitál no Promove Kooperasaun Investimentu iha Dezenvolvimentu Verde.

Alende ne’e, VPM Kalbuadi sei asina mos akordu ho Ajénsia Kooperasaun ba Dezenvolvimentu Internasionál Xina hodi Promove Implementasaun husi Inisiativa Dezenvolvimentu Globál no Promove projetus infraestruturas kooperasaun Xineza nian.

Iha Vietnam, VPM Kalbuadi sei asina akordu ida kona-ba Promosaun no Protesaun Investimentu.

Akordu sira ne’e sei asina iha vizita estadu Prezidenti Republika Jose Ramos-Horta ne’ebe sei halo vizita estadu ba Xina ho Vietnam hahu 27 Jullu to’o 4 Agostu 2024.

“Prezidenti Republika sei halo vizita ba Xina no Vietnam,” informa Primeiru Ministru Xanana Gusmão ba jornalista sira hafoin inkontru semanal ho xefi estadu, Kinta (18/7/2024), iha Palasiu Prezidensial Dili.

VPM Kalbuadi mos sei hetan akompanamentu husi ministru balun ne’ebe iha nia koordenasaun.