Timor-Leste ho Mozambique Halo Kooperasaun ba Mina no Gás

DILI, www.news-viptv.com – Timor-Leste no Mozambique asina ona akordu kona ba memorandum entendimentu ba kooperasaun ba Mina no Gás (Hidrokarbonetus no Mina).  

Akordu ne’e asina entre Ministru Negósiu Estranjeiru no Kooperasaun Timor-Leste Bendito Freitas ho Ministra Negósiu Estranjeiru no Kooperasaun Mosambike, Verônia Mocamo ho sasin husi xefi estadu nasaun rua, PR Jose Ramos-Horta ho Prezidenti Filipi Jacinto Nyusi.

Alende kooperasaun mina ho gás, asina mos kooperasaun rua seluk kona-ba estabelesimentu mekanizmu permanente ba konsulta polítika diplomátika, no kona-ba ensinu superior, siénsia no teknolojia nian.

“Assuntu seluk ne’ebé ko’alia mós mak iha área edukasaun, saúde, agrikultura, dezenvolvimentu kapital umanu inklui kooperasaun multilateral iha nível Nasoens Unidas no organizmu multilateral sira seluk ne’ebé Timor-Leste ho Mosambike bele tulun malu,” sita komunikadu imprensa ne’ebe redasaun simu husi Servisu Komunikasaun Sosial Prezidensia Republika, Sabadu (6/7/2024).

Iha xefi estadu nia vizita ba Mozambique, PR Ramos-Horta hateten, vizita estadu ne’ebe nia halo marka pasu signifikativu ida entre nasaun rua, hodi hametin liu tan lasu diplomatiku.

“Ramos-Horta hato’o agradesimentu kle’an ba apoiu ne’ebé maka’as husi Moçambique durante luta Timor-Leste nian ba independénsia,” publika komunikadu ne’e.

Iha ninia diskursu, PR Ramos-Horta ko’alia liu kona-ba ligasaun istórika, linguistika no kulturál ne’ebé Timor-Leste ho Moçambique fahe. Prezidente subliña papél krítiku ne’ebé hala’o hosi Moçambique no nasaun afrikanu sira seluk ne’ebé ko’alia lian portugés (PALOP) iha viajen Timor-Leste nian ba autodeterminasaun, ne’ebé kulmina iha ninia independénsia iha 20 Maiu 2002.

Xefe Estadu elojia eis-Prezidente Moçambique, Joaquim Chissano tanba nia esforsu no dedikadu hodi kaer Timor-Leste nia kauza iha nivel internasionál. Ramos-Horta fó-hanoin fali oinsá Moçambique fó hela-fatin ba estudante no diplomata Timor-oan sira durante sira-nia tinan luta nian, no mós haluan pasaporte Moçambique nian hodi fasilita sira-nia servisu viajen no advokasia internasionál.

Haree ba futuru, PR Ramos-Horta husu atu habelar kooperasaun entre nasaun rua iha área oioin, inklui edukasaun, diplomasia, no asuntu globál sira hanesan mudansa klimátika no dezenvolvimentu sustentável.

Xefi Estadu mós fó sai estabelesimentu embaixada Moçambique nian ida foin lalais ne’e iha Díli, hodi hametin liután relasaun diplomátika entre nasaun rua ne’e.