Timor-Leste ho India Konkorda Loke Edifisiu Embaixada

DILI, www.news-viptv.com – Timor-Leste ho India iha nia relasaun bilateral konkorda ona sei harii embaixada iha pais ida-idak hodi hakbesik no hametin koperasaun entre nasaun rua.

Hafoin Embaixadór Índia Sandeep Chakravorty aprezenta nia kredensiál diplomátiku ba Prezidente Republika (PR), Jose Ramos-Horta, Ministru Negosiu Estranjeiros no Kooperasaun, Bendito dos Santos Freitas informa hafoin enkontru ho xefi estadu espresa teb-tebes artikulasaun importansia kooperasaun bilateral no relasoens bilaterais entre Timor-Leste ho India, no mos assuntu ne’ebe ke prioridade tebes maka India ninia intensaun no dezeju atu opera ka funsiona ona embaixada India iha Timor-Leste.

“Timor-Leste mos iha planu atu harii ita nia embaixada Timor-Leste iha India, nune’e atu bele artikula no mos kanaliza ita nia kooperasaun ba nivel ida mais propriadu no mais elevadu,” dehan Bendito Freitas ba jornalista sira, Kuarta (20/12/2023), iha Palasiu Prezidensial, Dili.

Ministru ne’e esplika, India nasaun ida superpotentes tebes no entermus ekonomiku nu’udar mos nasaun ida ho populasaun barak, no sira nia dezemvolvimentu iha areas oin-oin, liu-liu kona ba sensia teknolojia, agrikultura, medisina, no formasaun.

Iha inkontru mos, ministru informa, Embaixadór foun ne’ee konvida xefi estadu atu halo vizita estadu ba India atu bele asegura liu tan relasaun ho estadu India nian.

“India mos hakarak apoiu ba formasaun diplomata sira ho mos apoiu kiik oan ruma ba ita nia estudante,” dehan Bendito Freitas.

Relasaun bilateral entre Timor-Leste no Índiahahu kedan iha 24 Janeiru 2003. Nasaun rua ne’e esplora ona kolaborasaun iha programa defeza, edukasaun, saúde, agrikultura no programa troka kultura.

Iha sorumutuk ASEAN-Índia nian iha Simeira ASEAN ba dala 43 iha Setembru 2023 liu ba iha Jakarta, Primeiru Ministru India, Narendra Modi anunsia ona desizaun atu estabelese misaun permanente ida iha Timor-Leste, hodi apoia kompromisu Índia nian ba ASEAN no ninia relasaun ho Timor-Leste.

Embaixadór Sandeep Chakravorty, iha nia knar diplomatiku lao ona durante tinan 30, kaer ona pozisaun xave sira hanesan Embaixadór Índia nian ba Peru no Bolivia, Konsul Jerál Nova Iorke, no Vise-Komisariu Aas iha Bangladesh. Molok nia hala’o nia knaar nu’udar Embaixadór iha Jakarta, nia servisu nu’udar Sekretariu Konjunta iha Ministeriu Negosius Estranjeirus Índia nian, hodi tau matan ba relasaun Índia nian ho Europa Osidentál no UE.

Embaixadór Indianu la’ós rezidente hetan akreditasaun ba Timor-Leste ho rezidénsia iha Jakarta.