TIC Atualiza Progresu e-Governu ba Primeiru Ministru

DILI, www.news-viptv.com –  Diretór Ezekutivu husi Ajênsia Teknolojia Informasaun no Komunikasaun, TIC TIMOR I.P., Roberto de Sousa Vicente hasoru malu ho Primeiru Ministru Taur Matan Ruak hodi aktualiza atinjimentu Governu Elektrónika ne’ebé oras ne’e dadaun la’o hela.

Roberto Vicente esplika, iha nia hasoru malu ho xefi governu iha asuntu importante rua ne´ebe nia relata hanesan Timor Digital no Identidade Uniku.

Ba Timor Digital, Diretór TIC Timor realsa parte husi programa importante ne’ebé hatur mais integradu liu-liu ba esforsu atinje objektivu ba reforma administrativu iha projektu rua importante agora dadaun ita halo ida mak hamosu hela esbosu lei mak ohin submete ona ba iha Primeiru Ministru para atu hetan aprovasaun iha Konsellu Ministrus, dokumentus estratejiku ida ita bolu dehan Timor Digitál 2022 to’o 2030 i dokumentu ne’e aprova tia nia mak sei sai baze ba esforsu dizitalizasaun husi Governu ida ne’e too espektativa 2032 bainhira nasaun ne’e deklara dizitalizadu entaun ida ne’e hein aprova husi Konsellu Ministrus.

“Dokumentu ida ne’e mós hanesan dokumentu prinsipal bainhira ita-nia parseiru dezenvolvimentu sira hakarak ajuda ita-nia liña Ministeriais sira, para sira estuda didiak iha planu estratéjiku Governu nian ne’ebé maka hatun iha dokumentu ida dizital Timor ninian i tantu mós liña Ministeriais bainhira atu dezenvolve setórial edukasaun, agrikultura, justisa no seluk-seluk tan, dokumentu ne’e mak sai referensia dezenvolve sira nia polítika dijitalizasaun iha Ministériu relevante,” dehan Roberto ba jornalista sira, Tersa (13/9/2022), iha residensia PM Taur, Farol Dili.

Kona ba identidade uniku, Roberto esplika, bolu Identidade Uniku katak, atribui numeru dizital ida ba sidadaun tomak hahú husi nia moris to’o nia mate.

“Estadu sei atribui Identidade Uniku ida hodi bele asesu serbisu ne’ebé Governu fó hanesan atu trata karta kondusaun, dokumentu eskola nian no seluk tan, projektu ida ne’e hala’o tanba hetan aprovasaun husi Konsellu Ministrus iha tinan 2021 liu ba nomos iha tinan 2022 hetan ona aprovasaun atu hala’o aprovizionamentu konsentra iha ekipa teknika aprovizionamentu nian,” dehan Roberto.