Termina Mandatu, Adidu POLRI Dezeja Susesu Amizade RI-TL

DILI, www.news-viptv.com  – Adidu Polísia Republik Indonesia (POLRI) iha Embaixada Repúblika Indonézia (KBRI) Díli, Timor Leste, Komisáriu Xefe Polísia, Dom Gaspar da Costahato’o nia dezeja susesu ba amizade entre Republika Indonesia (RI) ho Timor-Leste (TL)

Dezeja susesu amizade RI-TL ne’e adidu POLRI hato’o wainhira halo despedida ho Primeiru-Ministru (PM), Kay Rala Xanana Gusmão tamba missaun remata ona, Sexta (28/02/2025) iha Palacio do Governo, Dili.

“Ha‘u mai iha Palásiu Governu hasoru-malu ho Primeiru-Ministru, (PM) Kay Rala Xanana Gusmão hodi hala‘o despedida tamba durante ne’e (PM) Xanana Gusmão sai hanesan inspiradór, motivadór ne’ebé sempre tau-matan, sempre fo oportunidade atu ami bele hala‘o knaar no bele hakat bá oin iha misaun durante iha Timor-Leste liu-liu iha knaar sira hanesan adidu POLRI,” hateten Dom Gaspar da Costa ba jornalista sira.

Iha oportunidade ne’e Dom Gaspar da Costa husu nafatin apoiu morál hosi Xefe Governu, nune‘e nia bele fila-fali bá hala‘o knaar ho di’ak iha Kuartél Jeral POLRI iha Indonézia.

Nia mós agaradese no dezeja susesu nafatin iha relasaun amizade entre Timor-Leste ho Indonézia espesialmente POLRI-PNTL, PCIC ho SNI.

Komissariu Xefe Polísia, Gaspar da Costa simu kondekorasaun ho Medalla Ordem Timor-Leste nian hosi Prezidente Repúblika Demokrátika Timor Leste, José Ramos-Horta iha 26 Novembru 2024.

Medalla Ordem Timor-Leste nu’udár premiu aas-liu ne’ebé oferese hosi Estadu Timor-Leste bá indivídu, organizasaun ka instituisaun ne’ebé fó kontribuisaun estraordinária bá povu no nasaun Timor-Leste.

Prémiu ne’e hanesan símbolu rekoñesimentu bá servisu signifikativu sira iha área umanitária, polítika, sosial, ekonomia, kultura, diplomasia, dezenvolvimentu no mos relasaun internasional, ne’ebé ajuda dezenvolve nasaun Timor Leste.

Tanba ne’e, premiu ne’e oferese ba DondDa Costa ba dedikasaun  ne’ebé nia halo ona hanesan mós alumni Victoria University Melbourne 2006, liu-hosi ninia atividade oioin ne’ebé iha impaktu pozitivu bá Timor-Leste desde hahú servi hanesan Adidu Polísia iha Díli 08 Marsu 2022.

Don da Costa hanesan mos eis-xefe Relasaun Públika Polísia Nasaun Unidas (ONU) nian iha Áfrika, espesifikamente iha Sudaun no mós Sudaun Súl.