Teo Lay Cheng Embaixadora Rezidente Dahuluk Singapura ba Timor-Leste

DILI, www.news-viptv.com – Prezidente no Laureadu Nobel ba Pás J. Ramos-Horta  ofisialmente simu Karta Kredénsiál husi Teo Lay Cheng, Embaixadora Estraordinária no Plenipotensiária rezidente dahuluk Repúblika Singapura nian ba Repúblika Demokrátika Timor-Leste, Tersa (21/4/2026), iha serimónia formál ne’e hala’o iha Palásiu Prezidensiál Nicolau Lobato.

Embaixadora Teo Lay Cheng nu’udar diplomata kareira ida husi Ministériu Negósiu Estranjeiru (MFA) Singapura nian, ho esperiénsia iha kargu importante sira iha rai laran no rai liur.

Molok nia destakamentu ba Timor-Leste, nia serbisu nu’udar Embaixadora Singapura nian ba Reinu Kamboja hahú husi tinan 2021. Nia mós nu’udar Diretora ba Komunikasaun Estratéjika iha MFA. Iha tinan 2017, Teo harii Diresaun Komunikasaun Estratéjika, no tinan ida liutiha, nia lidera kampaña komunikasaun Ministériu nian durante tinan ida ba Prezidensia Singapura nian iha ASEAN.

Notavelmente, nia maka membru ida husi ekipa pioneiru ida iha Misaun Permanente Singapura nian ba ASEAN iha Jakarta, asumi kargu nu’udar Adjunta Reprezentante Permanente no Xefe Kanselaria ho titlu Diplomátiku husi Ministra-Konselleira husi tinan 2009 to’o tinan 2013.

Nu’udar rekoñesimentu ba ninia kontribuisaun sira ba Funsaun Públika, Embaixadóra Teo Lay Cheng atribui ho Medalla Administrasaun Públika (Bronze) iha tinan 2009.

Timor-Leste no Singapura partilla relasaun bilaterál ne’ebé metin ho abut iha solidariedade inisial no habelar kooperasaun. Singapura entre nasaun dahuluk sira ne’ebé estabelese relasaun diplomátiku ho Timor-Leste bainhira hetan nia independénsia iha tinan 2002 no kontribui pesoál militár sira ba misaun manutensaun pás ONU nian hafoin referendu  iha tinan 1999.

Pasu transformativu ida atinji iha fulan-Abril tinan 2024 ho abertura Embaixada Singapura nian iha Dili, ne’ebé kataliza ona investimentu Singapura nian iha setór krítiku sira hanesan edukasaun, saúde, agrikultura, peska, no infraestrutura. Liuhusi Programa Kooperasaun Singapura nian, ofisiál Timor-oan liu 1,100 maka simu ona formasaun dezde tinan 2012, hametin liután husi Pakote eSTARS ne’ebé lansa iha fulan-Jullu tinan 2025 hodi apoia Timor-Leste nia integrasaun ba ASEAN.

Kooperasaun inklui mós akordu referénsia médiku ho Ospitál Parkway (ne’ebé renovadu anualmente dezde tinan 2019), Akordu Servisu Aéreu atualizadu (2023), investimentu boot sira hanesan Heineken no A-Smart Holdings nia projetu “Timor-Leste Marina Square”, no solidariedade umanitária—Ezemplifikada husi esforsu tulun Cruz Vermelha Singapura nian hafoin inundasaun iha fulan-Abril tinan 2021. Parseria duradoura ida-ne’e reflete kompromisu hamutuk ba estabilidade rejionál, prosperidade, no apoiu mútuo iha tempu krize.

Prezidente Ramos-Horta hato’o boas-vindas ho laran-kmanek ba Embaixadora Teo no espresa konfiansa iha ninia abilidade atu hakle’an liután relasaun entre nasaun rua ne’e.

“Ohin loron marka pasu istóriku no signifikativu ida iha amizade entre Timor-Leste no Singapura. Aprezentasaun kredensiál husi Embaixadóra Teo Lay Cheng, Embaixadóra rezidente dahuluk husi Singapura, la’ós de’it formalidade diplomátika ida—ne’e hanesan testemuña ida ba solidariedade ne’ebé boot Singapura hatudu ona ba ita-nia nasaun dezde antes ita-nia renascimento nu’udar estadu independente. Husi tempu inisiu sira iha ita-nia luta, liuhusi misaun manutensaun pás, kapasitasaun, no agora investimentu transformativu iha ita-nia ekonomia no povu.  Ha’u fiar katak Embaixadóra Teo sei harii iha fundasaun ne’ebé metin ne’e, no ha’u hein atu iha kolaborasaun ne’ebé besik liután ba benefísiu mútuo husi ita-nia povu no estabilidade iha ita-nia rejiaun,” deklara Prezidente J. Ramos-Horta.

Timor-Leste nia kompromisu atu servisu besik ho Embaixadóra Teo Lay Cheng hodi realiza aspirasaun hamutuk ba rezultadu tanjível. Enkuantu nasaun rua ne’e haree ba futuru ida ho sira nia relasaun bilaterál ne’ebé kle’an liu, kredensial iha loron ohin sai hanesan símbolu ida ba respeitu mútuo, konfiansa estratéjika, no vizaun partillada ba Sudeste Aziátiku ida ne’ebé pasífiku no prósperu.