Dili, www.news‑viptv.com – Vitima desastre naturais inundasaun iha Kapital Dili neébe akontese tambá Siklonu Seroja iha 4 Abril 2021 agradese ba Governu neébe fo rekoperasaun liu hosi osan mao de obra no material konstrusaun harií uma nian neébe simu ona.
Elidio Afonso da Cruz nuúdar benefisariu neébe nia uma hetan estragus tambá rai monu senti kontenti ho apoia neébe nia simu hosi Protesaun Sivil tambá bele ajuda nia hadiak hikas nia uma.
“Hau fo obrigadu ba Protesaun Sivil, osan no material neébe mak fo mai ami atu ba halo uma hodi hela ho ami nia familia,” dehan Elidio ba VIP TV, Kuarta (13/07/2022), iha Edifisiu Diresaun Nasional Jestaun Risku Desastre Autoridade Proteção Civil nian iha Bemori, Dili.
Natalino Egidio Soares sente orgullu ba estadu tambá bele ajuda ona vitima inundasaun sira neébe nia uma hetan estragus.
“Senti orgullu no kontete tebes ba material sira neé,”dehan Natalino.
Desde Segunda (11/7/2022) Sekretaria Estadu Protesaun Sivil liu hosi Autoridade Protesaun Sivil iha Diresaun Nasinal Jestaun Risku Desastre distribui ona apoia ba vitima inundasaun 4 Abril Kapital Dili nian hamutuk 1,856.
Xefe Departementu Emerjensia no Rekoperasaun, Ermelinda Pires esplika hosi vitima 1,856 iha Kapital Dili nian neé, nain 694 hosi Postu Administrativu Dom Aleixo, Cristo-Rei 562, Vera-Cruz 182, Nain Feto 270, Metinaro 120 no Atauro 28.
”Vitima sira neébe simu fahe ba kategoria tolu hanesan aat total, aat naton no mos aat Kaman. Iha dadus aat total sira sei simu osan 850 ba mau de obra no 150 ba iha kustu transporte nee ba kategoria aat total. Ba aat naton sira simu osan maun de obra iha 600 no kustu transporte 150, no aat kaman sira simu osan mau de obra osan 450 no 150 ba iha kustu transporte,” esplika Ermelinda Pires.
Ba Kapital Dili Governu aloka US$ 1,408,000.
Alende vitima iha Kapital Dili, DNGRD-APC mos halo pagamento ona ba vitima desastre naturais iha Munisipiu Covalima hamutuk 34 ho osan hamutuk US$ 12,000.00, Ermera 91 ho total osan US$ 71,400.00 no Lautem 18 ho osan hamutuk US$ 11,800.00.
Total osan ba Munisipiu 4 neé hamutuk US$ 1,500,000.00