Rekrutamentu Membru Foun F-FDTL Prioridade ba Veteranu nia Oan

DILI, www.news-viptv.com – Instituisaun FALINTIL – Forsa Defeza Timor-Leste (F-FDTL) iha rekrutamentu foun ba nia membru sei fo prioridade liu ba veteranu sira nia oan ne’ebe uluk sakrifika sira nia an iha luta libertasaun Timor-Leste.

Ministru Defesa, Brigadeiro-Jeneral reformadu, Filomeno Paixao esplika iha prosesu rekrutamentu sei re-anunsia deit dokumentus antes ne’ebe selesiadu ona hamutuk 1800.

“Numerus ida ne’e ami kontrola nafatin halo versaun foun, maibe la loke ba publiku sira no kontinua ba numerous ne’ebe mak anterior nian,” dehan BrigJen ref, Filomeno Paixão ba jornalista sira iha konferensia imprensa ne’ebe halao iha Ministeriu Defeza, Sexta (8/7/2022), Fatu Hada, Dili.

Ministru defeza ne’e enkoraja ba feto Timoroan sira bele priense numeru 30 % ne’ebe prepara hodi bele sai forsa armada no sei la fo fatin ba kandidatu membru foun sira ne’ebe involve an ona iha atividade arte-marsiais.

“Sé mak tuir buat sira ne’ebé nia halo kompromisu ona, nia tenke sai, tanba iha ne’e, hanesan ha’u hatete ona, ami iha ne’e iha regra, para depois ita tuir,” deklara Ministru Filomino da Paixão.

Iha fatin hanesan, Xefi Estadu Maior Jeneral F-FDTL, Tenente Jeneral Falur Rate Laek fo hanoin nafatin ba jovem sira ne’ebe desidi ona tama forsa tenki kumpri regra militar nian no labele halai sai fali.

“Ita bo’ot sira kuandu tama militar ona ne’e eduka duni atu treinu military nian, tenki tuir regra militar nian, laos tama ona depois sai fali,” dehan TenJen Falur.

Diretor Jeral Administrasaun Finansas Ministeriu Defeza, Nuno Carvalho dos Santos informa Ministeriu Defeza tau ona orsamentu hamutuk  US$ 500,000 hodi halo rekrutamentu ba membru foun F-FDTL hamutuk ema nain 600.

Numeru 600 tuir planu, membru nain 240 sei aloka ba komponente Naval, 240 ba Komponente Terreste no 120 ba unidade seluk.