Rai Halai Estraga Uma Komunidade 14

DILI, www.news-viptv.com – Uma komunidade hamutuk 14 iha munisipiu 4 hetan estragus tamba dezastre natural rai halai.

Uma komunidade 14 ne’ebe hetan estragus tamba rai halai ne’e rejista husi Autoridade Protesaun Sivil (APC) iha Munisipiu Covalima iha 2, Ermera 9, Manatuto 1 no Manufahi 2.

Diretor Gabinete Relasaun Externa no Komunikasaun APC, Cesario Marquez nu’udar mos porta-voz APC ne’e esplika, akontesementu ne’e akontese husi periodu 1 to’o 8 Jullu 2024.

“Komesa husi 1-8 jullu 2024, durante semana ida nia laran iha teritorio Timor-Leste akontesetivu dezastre ne’ebe maka CNOPC, ne’ebe tutela ba iha Autoridade Protesaun Sivil (APC), Sekretariu Estadu Protesaun Sivil no Ministerio Interior rejista kazu ho tipu dezastre hamutuk 59 ne’ebe maka CNOPC rejista, mate (1), evakua ema (20) no insendiu anin boot rai halai no bee sae no asidente maritima,” informa Cesario Marquez iha konferensia imprensa, Segunda (8/7/2024) iha Edifisu APC, Kaikoli, Dili.

Alende rai halai, dezastre anin sobu mos estraga uma komunidade hamutuk 17 iha Munisipiu 6, kauza husi anin bo’ot.

“Numeru uma kain nebe estraga total ne’ebe mak agora dadau  regista hamutuk 21, numeru ema afetadus 185,” nia dehan.

Uma komunidade ne’ebe rejista hetan estragus tamba anin bo’ot husi Munisipiu Bononaro uma 3, Baucau uma 4, Covalima uma 1, Lautem uma 1 Manatuto uma 4, no RAEOA uma 4.

APC mos rejista asidenti maritima iha Munisipiu Atauro ne’ebe vitima iha nain 16 tamba ro’o mout ne’ebe husi numeru refere nain ida rezita mate, no nain 15 hetan salvasaun. Ema nain 16 ne’e Sidadaun Indonesia.

Rejista mos uma ida tamba insendu urbano ne’ebe akontese iha Munisipiu Dili, no uma 11 iha Munisipiu Lautem afeta tamba inundasaun ou be’e sae.