Primeira Reuniaun VI Lejislatura, PPN Diferente Interpretasaun ho Xefi Estadu

Dili, www.news-viptv.com – Prezidenti Parlamentu Nasional (PPN) Aniceto Guterres iha differenti interpretasaun ho xefi estadu kona ba primeira reuniaun VI Lejislatura.

Tuir PPN Aniceto, plenária dahuluk sei hahu, loron 15 hafoin tribunal valida rezultadu eleisaun.

“Ami ohin ko’alia kona-ba transferénsia husi kinta lejislatura ba sesta lejislatura nian, tuir rejimentu tenki hahú ho primeira reuniaun, agora atu realiza primeira reuniaun ne’e, bainhira ami iha interpretasaun diferente agora ha’u ho eselénsia señór Prezidente da Repúblika, ami iha interpretasaun ne’ebé diferente,”  dehan Aniceto Guterres ba jornalista sira, Tersa (6/6/2023) hafoin hasoru malu ho PR Ramos Horta iha Palasiu Prezidensial, Dili.

Maski diferente interpretasaun, tanba interese estadu nian, PPN ne´eesplika, nia tuir de’it interpretasaun PR Horta nian, sei kumpre prazu ne’ebé mak determina.

Nune’e, Prezidente Parlamentu Nasional sei ba konsulta ho líder bankada parlamentar sira, nun’e bele fiksa data ba tomada de posse ba deputadu sesta lejislatura nian.

Tribunal Rekursu iha 5 Junu 2023, valida ona rezultadu eleisaun parlamentar 21 Maiu 2023 ne´ebe Partidu CNRT maka sai vensedor ho kadeira 31 tuir kedan FRETILIN 19, PD 6, KHUNTO 5 no PLP 4.