DILI, www.news-viptv.com – Ministeriu Juventude, Desportu Arte no Kultura (MJDAK) hahu inkontru dahuluk interministerial nian ba preparasaun no kordenasaun jogo desportivas CPLP la dala 12 ne’ebe sei realiza iha hahu 17 to’o 27 Jullu 2025, iha Dili, Timor-Leste.
Inkontru interministerial ne’e hodi fahe servisu kada ministerial sira ne’ebe sei fo apoia ba Komisaun Organizadora ne’ebe lidera husi MJDAK.
“Ita iha komisoens interministerial, nomos iha komisaun teknika ida iha ministerius nia laran, hodi koordena ba Jogos CPLP nian,” informa Nelyo Isaac Sarmento ba jornalista sira hafoin inkontru, Sexta (24/1/2025), iha Edifisiu MJDAK, Lecidere, Dili.
Nia hatutan, “Ita sei iha kondisoens balu ne’ebé presiza urjentimente atu hadia, nune’e mós hodi hare kondisoens balu iha linas ministeriais sira, liga ba no prepara tia ba iha area saúde nian saida mak sira bele prontu ona atu halo, i nune’e mós iha protukolu ninian, iha mos kona ba publisidade ba komunidade sobre jogu ne’e rasik, nomos seguransa ba iha jogu ne’e rasik, linhas ministeriais sira hotu mai atu rona komisaun teknika sira atu aprezenta ba sira kona bá kondisoens ne’ebé mak agora iha, hodi lao ba iha Jogos CPLP.”
Membru governu ne’e mos hateten, iha 22 fevereiru 2025, Komisaun teknika CPLP ne’ebe sei apoia ba jogos ne’e sei mai Timor-Leste hodi hare preparasaun no kondisaun Timor-Leste nian ba realizasaun jogos CPLP.
Ba jogos Desportivas CPLP ne’e, hamutuk iha modalidade 9 maka sei realiza hanesan atletismu, futebol, karate, taekwondo, xadres, volley praia, basket 3 on 3, tenis do kampu no para-atletismu.
Hamutuk 706 atletas ne’ebe sei compete ba jogos desportivas ne’e ho nia numeru atletas Angola 101, Brasil 101, Cabo Verde 101, Guiné-Bissau 61, Guiné Equatorial 35, Mozambique, 70, Portugal 101, São Tomé e Príncipe 35 no Timor-Leste 101.
Orsamentu ne’ebe Governo koloka ba evnteu internasional ne’e maka dolares amerikanu tokon 3.7.
Iha inkontru interministerial ne’e, ministeriu ne’ebe involve maka Ministeriu Negosiu Estranjeiru no Kooperasaun, Ministeriu Interior, Ministeriu Saude, Ministeriu Edukasaun, Ministeriu Ensinu Superior, Siensia no Kultura, Ministeriu Transporte no Komunikasaun, Ministeriu Administrasaun Estatal, Ministeriu Turismu no Ambiente, Ministeriu Komersiu no Industria, Ministeriu Planeamentu, Investimentu no Estratejiku, no Sekretaria Estadu Komunikasaun Sosial.