PR Ramos-Horta Simu Karta Kredensial Husi Embaixador Angola

DILI, www.news-viptv.com – Prezidente no Laureadu Nobel ba Pás, Jose. Ramos-Horta simu kredensiál diplomátiku husi José Andrade de Lemos nu’udar Embaixadór foun Estraordináriu no Plenipotensiáriu Repúblika Angola nian ba Repúblika Demokratika Timor-Leste iha Serimónia kredensiál ne’ebe hala’o iha Palásiu Prezidente Nicolau Lobato, Kinta (23/5/2024).

Embaixadór José Andrade de Lemos nu’udar diplomata Angolanu ida ne’ebé susesu ho karreira ne’ebé hala’o durante tinan tolu-nolu nia laran. Nia servisu nu’udar konselleiru iha Gabinete Sekretáriu Estadu Negósius Estranjeiru (SENE) no Embaixadór Angola nian ba Emiradus Arabes Unidus, Arabia Saudita, Kuwait, Qatar no Bahrain.

Timor-Leste no Angola iha ligasaun istórika ida-ne’ebé kle’an iha sira-nia luta ba libertasaun nasionál. Nasaun rua ne’e iha kompromisu atu hametin sira-nia relasaun bilaterál amigável iha ámbitu Komunidade Pais Lian Portugés (CPLP- sigla português). Timor-Leste rekoñese potensialidade Angola nian iha setór mina-rai no gás, hodi hatudu interese iha parseria diplomátika, ho Angola sei sai hanesan nasaun primeiru husi nasaun Afrika ne’ebé ko’alia lian portugés hodi loke embaixada iha Timor-Leste, hodi kontinua relasaun diplomátika.

Iha komunikadu imprensa ne’ebe redasaun simu hatete, Kooperasaun entre nasaun rua ne’e mós haluan ba asuntu rejionál sira, inklui disputa marítima iha Tasi Xina Súl, iha ne’ebé Timor-Leste apoiu rezolusaun pasífika liuhosi diplomasia. Nasaun rua apoiu malu iha esforsu multilaterál sira inklui esforsu Timor-Leste nia integrasaun ba ASEAN no pozisaun Angola nian iha Sahara Osidentál.

Prezidente Ramos-Horta hato’o nia konfiansa katak Embaixadór José Andrade de Lemos sei hasa’e no hametin ligasaun amizade no kooperasaun entre Timor-Leste no Angola.