PR Ramos-Horta Rekonese Kontribuisaun Xina ba Desenvolvimentu Timor-Leste

DILI, www.news-viptv.com – Prezidente Repúblika, Jose Ramos-Horta rekonese Xina nia kontribuisaun signifikatiu sira ba Timor-Leste nia desenvolvimentu, inklui miliaun 7500 Xina yuan iha subsídiu sira ba projetu infraestrutura sira no apoiu krusiál durante pandemia COVID-19.

Rekonesementu ba kontribuisaun Xina ba Timor-Leste ne’e xefi estadu hatoo iha nia deskursu badak wainhira partisipa resepsaun official ba selebrasaun aniversariu fundasaun Repúblika Populár Xina ba dala 75 iha Embaixada Xina iha Dili, Sexta (20/9/2024).

Xefi estadu mos Fó hanoin kona-ba ligasaun istóriku sira ne’ebé hahú kedas iha dékada 1400, inklui hateten Xina nia papél nu’udar Membru Permanente Konsellu Seguransa ONU nian dahuluk ne’ebé rekoñese Timor-Leste nia soberania iha tinan 1975.

Prezidente reafirma kompromisu Timor-Leste nian ba Polítika Xina Ida de’it no louva esforsu diplomátiku Xina nian hodi halo mediasaun ba konflitu internasionál sira.

Embaixadora Xina mai Timor-Leste, Wang Wenli hateten, Xina kontinua nia komitmentu hodi apoiu Timor-Leste nia dezenvolvimentu no kooperasaun iha setor oioin jerasaun ba jerasaun.