PR Ramos-Horta Kongratula Sua Majestade Liurai Malázia

DILI, www.news-viptv.com – Prezidente Repúblika (PR), Jose Ramos-Horta, hodi povu Timor-Leste nia naran, hato’o ninia kmanek parabéns ba Sua Majestade Sultan Ibrahim ba ninia koroasaun nu’udar Liurai da-17 Malazia nian. Prezidente transmite nia felisitasaunn liu husi karta ida dirije ba Sua Majestade iha 20 jullu 2024.

Iha ninia Karta, Prezidente Ramos-Horta destaka relasaun forte entre Timor-Leste no Malazia, ne’ebé bazeia ba solidariedade no asisténsia invaluável ne’ebé Malázia fó durante tempu krítiku sira.

Nasaun rua ne’e goza relasaun bilaterál no kooperasaun eselente, partikularmente iha área defeza, saúde, no edukasaun.

Prezidente Ramos-Horta espressa gratidaun ba kontribuisaun signifikativu Malázia nian ba Timor-Leste dezde 1999.

“Dezde restaurasaun ami-nia independénsia iha Maiu 2002, Malázia nu’udar apoiante ida metin ba Timor-Leste nia aspirasaun atu tama ASEAN. Ha’u iha esperansa metin katak lius husi Presidénsia Malázia nian iha tinan 2025, Timor-Leste nia aspirasaun atu tama ASEAN sei formáliza,” dehan Prezidente Ramos Horta, iha komunikadu imprensa ne’ebe redasaun simu hosi Gabinete Servisu Komunikasaun Sosial Prezidensia Republika.

Iha tempu inserteza rejionál no globál sira agora, Timor-Leste haree ba Malázia nia lideransa hodi enfrenta dezafiu sira ho efetivu. Prezidente hato’o ninia konfiansa katak Malázia sei kontinua progresu no goza dame no estabilidade iha lideransa Sua Majestade Sultan Ibrahim.

Timor-Leste reprezentadu iha serimónia koroasaun husi Embaixadór Timor-Leste nian ba Malázia, Lisualdo Gaspar. Serimónia ne’e realiza iha Istana Negara, Kuala Lumpur, Malázia Sabadu (20/7 2024) dadersan oras Kuala Lumpur nian.