PR Ramos-Horta Husu Jornalista Timoroan Sai Guarda Ambiental

DILI, www.news-viptv.com – Prezidenti Republika (PR), Jose Ramos-Horta iha nia mensajem ba loron mundial Liberdade Imprensa husu ba jornalista Timoroan sira atu sai Guarda Ambiental.

“Iha Loron Mundiál Liberdade Imprensa nian ida-ne’e, Xefi Estadu husu jornalista Timoroan sira atu renova komprimisu ba Imprensa ba Planeta ne’ebé fó sai lia-loos ambientál sira, fó inspirasaun ba mudansa sira, no proteje natureza iha mundu ba jerasaun sira tuir mai,” apela PR Ramos-Horta, iha komunikadu imprensa ne’ebe redasaun assesu hosi Servisu Komunikasaun Sosial Gabinete Presidensia Republika.

Ho loron importante ba imprensa sira ne’e, Laureadu Nobel ba Pás ne’e, hato’o Parabens ba jornalista sira ne’ebé fó naroman ba ameasa urjente ida-ne’ebé hasoru umanidade – krize ambientál. Imprensa ida-ne’ebé livre no independente ne’e esensiál tebes atu hasa’e konsiénsia, dirije asaun, no kaer metin lider sira no instituisaun sira ne’ebé responsavel ba asuntu ambientál sira.

Ho Tema iha 2024 “Imprensa ba Planeta” ne’e, xefi estadu hateten hanesan apelu importante ida ba jornalizmu atu foka nia lensa ba degradasaun husi ita-nia natureza mundu nian. Husi mudansa klimátika to’o lakon biodiversidade, poluisaun to’o desflorestasaun, emerjénsia ambientál fó impaktu ba kada nasaun, komunidade, no ema iha planeta ida ne’ebé ita bolu uma.

“Iha Timor-Leste, ita-nia nasaun foin-sa’e ida ne’e hetan ona efeitu ne’ebé aat tebes husi mudansa klimátika inklui produsaun agríkola ne’ebé menus, inseguransa ai-han, falta bee, destruisaun infraestrutura, lakon vida no deslokasaun umanu. Ita-nia futuru no sorte sira liga ho ita-nia kualidade anin, rai no tasi. Ita tenke proteje ita-nia ambiente ne’ebé importante tebes atu sustenta ita,” dehan Xefi Estadu ne’e.

Nia haktuir tan, Ambiente la iha lian rasik – presiza lian imprensa livre atu sai nia advogadu ba prezervasaun no restaurasaun.