PR Ramos-Horta Husu Embaixador sira-nia kaben Apoia Programa “Dapur ba Povu”

Dili, www.news-viptv.com – Prezidenti Republika (PR) Jose Ramos-Horta iha sorumutuk ho embaixador sira-nia kaben ne’ebe rezidensia iha Timor-Leste husu atu bele kolabora ba programa dezenvolvimentu ho objetivu atu hadi’a nutrisaun ba labarik sira iha Timor-Leste liu hosi Dapur ba Povu.

“Dapur ba Povu” nu’udar programa ida hosi inisiativa xefi estadu hodi fornese hahán nutritivu ba labarik sira iha área Palásiu Prezidensiál.

Kaben hosi Embaixador Indonezia, Flantina Manik hateten nia parte prontu atu servisu hamutuk ho komunidade internasional hodi apoia programa prezienti repulika nian, inklui iha prevensaun ba ras badak (Stunting).

“Ita hotu-hotu tenke fó-liman ba malu, hodi servisu hamutuk ba ita-nia oan sira atu hetan nesesidade sira ne’ebé sira presiza. Atu nune’e ita bele sai parte, ne’ebé ita bele hanoin, ita mós suporta, tanba ita mak inan sira ne’ebé iha oan, nune’e ita mós hakarak asegura katak labarik hotu-hotu liu-liu labarik sira iha Timor Leste hetan nesésidade sira ne’ebé sira tenke hetan, hahán ne’ebé tein ona no seluk,” dehan Flantina Manik.

Aleinde programa “Dapur ba Povu,” Ramos-Horta buka kolaborasaun kona-ba inisiativa prezidensiál ne’ebé luan liu ne’ebé investe iha foin-sa’e sira iha nasaun, liu husi saúde, edukasaun no oportunidade ekonómika sira. Prezidente enkoraja komunidade internasionál iha Timor-Leste atu envolve ativu iha prosesu dezenvolvimentu nasaun nian.

Embaixadór sira-nia kaben kompromete ba kauza ne’e, hodi hateten sentimentu katak fó prioridade ba labarik sira-nia moris-di’ak ohin loron nian sai hanesan fundasaun ba futuru ida-ne’ebé prosperu ba Timor-Leste.

Responsabilidade ba Kantina Matak, Bela Galhos, hateten, Kantina Matak nu’udar fatin esensial ba dapur Prezidente Repúblika nian ba povu kbiit laek sira.

“Kantina matak nee, fatin neebe mak fornese ai-han ba populasaun sira, liuliu labarik, feto isin rua, feto sira neebe kous labarik, mai husi familia kiak, ida nee sai kestaun neebe preokupasaun boot husi Prezidente Repúblika, tanba kestaun mal notrisaun, labarik sira krekas no labarik sira  ho familia neebe la iha asesu ba hahan saidavel,” dehan Bela Galhos.