PR Ramos-Horta Halo Vizita Estadu ba Mozambique no Angola

DILI, www.news-viptv.com – Prezidente Republika (PR), Jose Ramos-Horta, Tersa (02/7/2024) sai ona husi Dili hodi hahú vizita ofisiál estadu nian ba Repúblika Mozambique no Repúblika Angola, husi 3 to’o 10 Jullu 2024.

Vizita hirak-ne’e ho objetivu atu hametin relasaun diplomátika, promove kooperasaun, no hametin relasaun bilaterál ho nasaun Lusófonu sira.

Iha komunikadu Imprensa ne’ebe redasaun simu hatete, durante vizita ba Mozambique husi 3 to’o 7 jullu, Prezidente Ramos-Horta sei hala’o sorumutu Tête-à-Tête ho Prezidente Mozambique, Filipe Jacinto Nyusi.

Prezidente sei partisipa iha sorumutuk bilaterál sira, tuir mai ho asinatura akordu sira, no konferénsia imprensa konjunta ho Prezidente Nyusi.

Prezidente nia programa iha Mozambique sei inklui mós tau koroa aifunan iha Prasa Erói nian, simu Xave Sidade Maputo nian, hasoru ho Prezidente Asembleia Repúblika Mozambique nian, Esperança Bias, atende Banquete Estadu iha Palásiu Ponta Vermelha, fó palestra iha Universidade Eduardo Mondlane kona-ba “Timor-Leste, Rejiaun no Mundu,” no vizita Sentru Análize Estratéjika CPLP nian.

Husik Mozambique, Prezidente Ramos-Horta sei kontinua viajen ba Luanda, Angola, husi 8 to’o 10 Jullu 2024.

Programa Prezidente nian iha Angola inklui partisipa iha serimónia estadu, halo enkontru bilateral no sorumutu Tête-à-Tête ho Prezidente Angola, João Lourenço, no tuir mai ho konferénsia imprensa.

Prezidente Ramos-Horta sei hasoru mós ho Vise-Prezidente Angola, Esperança da Costa, no Prezidente Asembleia Nasionál, Carolina Cerqueira. Prezidente sei fó palestra ida iha Akademia Diplomátika Venâncio de Moura, vizita Akademia Polísia, no atende serimónia ida iha fasilidade foun Embaixada RDTL nian iha Angola.

Vizita estadu sira ne’e hatudu Timor-Leste nia kompromisu atu haforsa ninia relasaun internasionál no haburas kooperasaun iha Komunidade Nasaun Lian Portugués nian, CPLP.

Prezidente hein atu halo diskusaun produtivu kona-ba interese komún, inklui kooperasaun ekonómika, interkambiu kultural, no seguransa rejionál. Timor-Leste nia relasaun ho Angola no Mozambique metin iha istória komún hanesan antigas kolónias Portugésa no membru CPLP. Vizita hirak-ne’e reprezenta pasu signifikativu ida atu haforsa ligasaun no esplora dalan foun sira ba kolaborasaun.