PR Horta Fo Posse ba Brigadeiru-Jeneral Trix nu’udar XEM F-FDTL

Dili, www.news-viptv.com – Prezidente Repúblika, José Ramos-Horta fó posse ba Brigadeiru Jeneral, José da Costa ‘Trix’ nu’udár Xefe Estadu Maior (XEM) F-FDTL hodi troka Contra-Almirante Donaciano do Rosário Gomes “Pedro Klamar Fuik”, ne’ebé oras ne’e asumi ona kargu nu’udar Ministru Defeza.

Prezidente Repúblika (PR), Jose Ramos-Horta iha nia diskursu hateten ho mudansa lideransa ne’e bele dinamiza no adaptável liu tan ba servisu sira iha forsas armadas hodi hasoru dezafiu foun sira iha tempu agora no ba futuru, tuir misaun ne’ebé konstituisaun RDTL atribui, liuliu iha ambiente operasionál ne’ebé depende ba sistema integradu nasionál hodi haforsa kooperasaun ne’ebé amigavel ho nasaun vijiñu no rejionál.

“Ha’u hakarak hatete nomeiasaun ne’e mai husi rezultadu ba prosesu ida ne’ebé ho kuidadu tebes nakonu ho transparansia ne’ebé ejije implementasaun la’ós de’it ba mudansa iha estrutura orgánika F-FDTL nian, ho ezonerasaun ba nia kargu hanesan Komandante Komponente Terrestre, maibé ida ne’e nu’udar mudansa individual ba nia kareira militár ho servisu públiku ba povu no nasaun, ho sira ne’e hotu Trix merese ba promosaun ba Postu Brigadeiru Jenerál ne’ebé konkretiza ho seremónia ida ne’e,” dehan PR Horta, iha Palásiu Prezidénsia, Segunda (30/10/2023).

PR Horta informa, Trix antes ne’e dezempeña ona funsaun iha estrutura militár  no asume kargu hanesan Xefe Kaza Militár to’o mai hanesan Komandante Terrestre, no funsaun sira ne’e sai hanesan testamuña ba nia kompeténsia no dedikasaun ba kestaun sira seguransa nasionál.

Ho papél foun hein katak Brigadeiru Jenerál Trix bele konduza atividade sira Komandu nian no enfrenta dezafiu sira iha tempu ohin loron no ba futuru. Defende rigorozamente sistema integradu seguransa nasionál no fortalese aliansa ho nasaun viziñu no amigu sira hotu, esepesialmente ho parseiru sira besik liu iha organizasaun rejionál Sudeste Aziatiku (Asian), iha prespetiva ida ba seguransa no kooperativa alargada, hatete PR-Horta.

Entertantu, Brigadeiru-Jenerál José da Costa Soares ‘’Trix’’ sei fó dedikasaun tomak hodi reforsa Instituisaun F-FDTL.

“Ha’u-nia komitmentu mak atu kontribui ba iha reforsa planeamentu jerál no koordenasaun atividades sira ne’ebé tutela ba iha Xefe Estadu Maior das Forsas Armadas, hodi dinamiza liutan servisu operasionál sira,” hateten jeneral fitun ida ne’e.