PR Apoia Nesesidade Bazika ba Sarani Parokia Dare

Dili, www.news-viptv.com – Hodi apoia prosesu rehabilitasaun igreja São Francisco Xavier Dare iha Parokia Dare nian, liliu ba sarani sira ne’ebe servisu voluntaria, Presidensia Republika (PR) apoia nesesidade bazika ba sarani Parokia Dare.

Sasan nesesidade bazika ne’e entrega dereta hosi Assesor Sosiedade Sívil no Apoiu Sosiál husi Prezidénsia Repúblika (SSAS), Quintiliano Moniz no simu hosi Padre Domingos Bian, Sabadu (2/12/2023).

“Prezidente hare proposta ne’e prioridade tebes, nune’e prezidente orienta kedas parte Sosiedade Sivíl para organiza ai-han ruma hodi entrega ba amu no komunidade sira ne’ebé halo hela serbisu voluntáriu ba igreja ne’e,” dehan Quintiliano Moniz.

Entertantu Padre Domingos Bian hato’o agradesimentu no haksolok ba PR Ramos-Horta liu husi Servisu Sosiedade Sivíl no Apoiu Sosiál, Sábadu ne’e ajuda nesisidade bázika hanesan Fós, mina, Kafé, no mie instant.

“Agradese ba Prézidente Repúblika Sua Exelensia Dr. José Ramos-Horta, liu husi gabinete prezidensia Repúblika nian, hodi fó ona apoiu ba ami nia serbisu voluntáriu iha Parokia São Francisco Xavier Dare, iha programa preparasaun ba festa padroeiru parokia nian,” hateten Padre Domingos Bian.

Apoia ne’ebe sira simu, esplika Padre pároku ne’e signifikante tebes bele fó han Komunidade husi Bairu no Aldeia sira ne’ebé loron-loron mai halo servisu voluntariamente, re-abilita igreja no hamo’os jardin iha resintu igreja nian, atu selebra loron padroeiru parokia ne’ebé sei festeja iha 17 Dezembru 2023.

Parokia Dare nu’udar parokia antigu, ne’ebé forma Timoroan barak liu husi edukasaun no formasaun oin-oin no kontribui ona ba Estadu Timor-Leste. Sarani Parokia São Francisco Xavier Dare, kompostu husi Suku rua, Suku Dare pretense Munisipiu Dili no Suku Balibar pertense Munisipiu Aileu nian.