PNTL Kaer Utilizador FB Uza Naran Espousa Komisariu Pedro Belo

DILI, www.news-viptv.com – Departamentu Investigasaun Kriminaál (DIK) Polísia Nasionál Timor-Leste (PNTL) detein suspeitu ida, ho inisial JMS ne’ebe uza ID Facebook Espousa Segundu Komandante-Jerál Komisáriu Pedro Belo ho naran Laticha Valente Belo hodi manda Mensajen, Fotografia no Vidio Porno hodi esplora no husu osan ba ema seluk (hais ema).

Suspeitu JMS ne’e rejistu ho NUC 0129/24. PNSIK, dadauk ne’e detein hela iha sella detensaun Komando PNTL Munisipiu Dili no sei aprejenta suspeitu hirak ne’e ba Tribunal hodi tuir primeiru interogatoriu antes oras 12.

Iha loron hanesan, DIK-PNTL halo detensaun ba suspeitu ho inisial FJF, ne’ebe iha fulan Outubro tinan 2023 ate fulan Desembro de 2023 deskonfia envolve kazu Burla Agravado, Bosok vitima sira atu fasilita ba servisu iha Australia, ho ninian kriteria kada ema ida hatama osan U$ 100.00.

Rekrutamentu nee suspeitu konsege hetan osan total U$7, 400, 00, vitima nain 7 mak halo ona keixa. kazu nee prosesu ho NUC 0130/24. PNSIK .

PNTL mos husu ba publiku atu kuidadu ho utilizasaun media social tamba iha ona ema balun ne’ebe sai vitima scheming.