PN Halo Fiskalizasaun ba PITSA

DILI www.news-viptv.com Relasiona ho polemika ne´ebe mosu kona ba reserva kombustivel menus, Komisaun C Parlamentu Nasional (PN) tun dereta hodi halo fiskalizasaun ba kompana PERTAMINA Internasional, SA (PITSA).

Objetivu Komisaun C PN halo fiskalizasaun ba PITSA hodi hare deretamente stock kombustivel ne´ebe dehan menus iha Timor-Leste no hamosu situasaun paniku ba publiku sira.

“Sira nia stock mina horikalan foin toó. Sira prontu atu oferese mina ba ita nia rai no sosiedade,” dehan Prezidente Komisaun C PN, Nina Rangel ba Jornalista sira, Kuarta (28/7/2022), iha Pantai Kelapa, Dili.

Alende ba PITSA, membro Komisaun C PN ne´e mos halo fiskalizasuan ba estasaun kombustivel sira iha Kapital Dili hodi observa situasaun fornesementu nian ba publiku.

Nina Rangel mos informa parte PN sei koalia ho Autoridade Nasional Petroleu no Minerais (ANPM) hodi esplika kona ba presu konbustivel iha Timor-Leste nian ne´ebe kontinua sa´e bebeik.

Iha fatin hanesan, Prezidenti ANPM, Florentino Ferreira esplika parte sira nia esklarese ona ba publiku liu hosi informasaun ne´ebe publika ona liu hosi sira nia pajina offisial iha media sosial katak stock kombustivel iha Timor-Leste normal hela.

“Boatus ne´ebe maka iha publiku sira dehan mina menus ne´e lalos,” deklara Florentino Ferreira.