PM Xanana Oferese Uma Foun Bá Inan Faluk Imaculada Atolan Iha Hali Dolar

DILI, www.news-viptv.com  – Primeiru-Ministru (PM), Kay Rala Xanana Gusmão entrega uma foun bá inan faluk Imaculada Atolan ho oan ki’ak na’in-tolu iha aldeia Hali Dolar, Domingu (31/08/2025), Suku Hera, Postu Administrativu Cristo Rei, Munisípiu Díli.

Uma ne’e kompleta ho kuartu toba nian, sala vizita, kuziña, fasilidade sanitária, ne’ebé konstrui hosi Grupu Voluntáriu ho naran The Best Town.

Grupu Voluntária ne’e mós hola kedan kama ho kulsaun, sasan kuziña kompletu, hahan balun inklui Bisikleta tolu bá labarik sira atu bele uza.

Iha Komunikado Imprensa ne’ebe redasaun asesu, Grupu The Best Town ne’e forma husi ema na’in-lima mak hanesan, Rudy Kwan, Euclides Belo, Nuno Saldanha, Januario Baptista no Aliung Ho nu’udár Grupu Voluntáriu ida ne’ebé durante ne’e fó apoiu bá ema kbiit la’ek sira ne’ebé presiza duni tulun ho orsamentu mai hosi kontribuisaun membru grupu ne’e rasik.

Primeiru-Ministru konsidera grupu ne’e sai hanesan ezemplu bá Timor-oan hotu atu fahe buat ne’ebé iha bá maluk sira seluk ne’ebé presiza tulun.

“Agradese bá imi nia laran lu’ak tanba harii ona uma dignu ida ho oferese bá maluk ne’e. Ita bo’ot sira sai inspiradór bá maluk Timor-oan sira seluk atu banati tuir hodi fahe buat ne’ebé iha bá maluk sira seluk mak sei moris terus. Kontinua asaun ne’ebé imi halo, tanba dezenvolvimentu nasaun no moris di’ak povu nian presiza kontribuisaun hosi sidadaun hotu nian. Agradese bá imi,” (PM), Xanana agradese.

Grupu ne’e mai halo uluk observasaun bá fatin, liu-liu uma ne’ebé inan faluk ne’e hela bá laiha duni kondisaun ho nia oan na’in tolu tanba iha tempu udan tenke taka lona iha muskiteiru leten mak bele toba.

Ho situasaun ne’e maka Grupu ne’e hola inisitiva hodi organiza malu no oferese uma ida maski simples loos, maibé sira esforsu atu kria kondisaun possível ida nune’e sira na’in-ha’at bele hela bá tempu naruk no labele kona udan been iha tempu udan inklui hadook sira hosi loron manas.

Grupu Voluntáriu The Best Town konstrui uma ne’e ho durasaun semana rua, hanesan prezente ida bá inan faluk Imaculada Atolan ho oan na’in-tolu iha Komemorasaun Loron Konsulta Populár bá dala-26 iha tinan ida-ne’e.

Tanba ne’e maka grupu konvida mós Primeiru-Ministru, Kay Rala Xanana Gusmão mak entrega direta tanba Xefe Governu ne’e nu’udár inspiradór ida bá servisu voluntarizmu.

Inan faluk Imaculada Atolan agradese bá Grupu The Best Town ho matan been, tanba grupu ne’e iha fuan bo’ot hodi konstrui uma di’ak ida ne’ebé nia rasik la espera.

Imaculada mós agradese bá Joven Amaro da Costa Tilman ne’ebé hasai fotografia bá kondisaun uma ne’ebé nia hela ho grave tebes no publika iha média sosiál ikus mai Media GMN bele mai halo kobertura no publika, konsege dada atensaun Grupu The Best Town hodi mai ajuda oferese uma ne’e.

“Ha’u kbiit laiha atu selu maun sira nia favór, maibé Maromak mak sei selu buat di’ak hotu ne’ebé mak imi halo mai ha’u ho ha’u-nia oan sira. Ha’u iha de’it mak lia-fuan agradesimentu hosi fuan ne’ebé kle’an tebes,” Imaculada agradese.

Inan faluk Imaculada Atolan mai hosi Rejiaun Administrativa Espesiál Oecusse Ambeno (RAEOA) no kaben ho ema hosi parte Venilale Munisípiu Baucau maibé mate ona iha tinan ida liu bá husik hela oan na’in-tolu.