Ezonera Jose Belo, Konsellu Ministru Hili Elizeu Isaac ba Prezidenti Konsellu Administrasaun RTTL

Dili, www.news-viptv.com  – Konsellu Ministru iha sorumutu Kuarta (26/2/2025) hili ona Elizeu Isaac Fernandes ba Prezidente Konsellu Administrasaun Rádiu no Televizaun Timor-Leste, EP (RTTL, EP) hodi troka Jose Belo “Taraleu” ne’ebe ezonera huis Sekretariu Estadu Komunikasau Sosial, Expedito Dias Ximenes.

“Aprova mós projetu Rezolusaun Governu, ne’ebé aprezenta hosi Sekretáriu Estadu Komunikasaun Sosiál, Expedito Dias Ximenes, ne’ebé determina ezonerasaun ba atuál Prezidente Konsellu Administrasaun Rádiu no Televizaun Timor-Leste, EP (RTTL, EP) no nomeasaun ba Elizeu Isaac Fernandes hodi asume kargu ba mandatu tinan haat,” sita komunikadu imprensa Prezidensia Konsellu Ministru.

Nomeasaun Elizeu Isaac ne’e bazeia ba kapasidade téknika no jestaun ne’ebé rekoñesidu hosi Prezidente foun, no mós ninia esperiénsia profisionál, senioridade, idoneidade no imparsialidade.

“Primeiru orgullu hanesan Timoroan ida bele bele hetan konfiansa husi IX Governo hodi partisipa direta ba dezemvolvimento rai doben timor leste liu liu iha area komunikasaun nebe hau estuda ba, maibe la signifika ne’e oportunidade, maibe ne’e hau rekonhese hanesan responsablidade,” dehan Elizeu Isaac ba VIP TV, Kuarta (26/2/2025).

Antes ne’e Elizeu Isaac asumi kargu nu’udar Xefi Gabinete ba Sekretariu Estadu Komunikasaun Sosial (SEKOMS) desde Jullu 2023.

Iha 2018-2020 haknar aan mos nu’udar assessor media no komunikasaun iha Gabinete Ministru Administrasaun Estatal.

2017-2018 no 2013-2017, servisu nu’udar offisial media iha Gabinete Sekretaria Estadu Apoia Sosiu-Ekonomiku Feto nian.

Knaar dosente mos nia assumi iha Universidade Nasional Timor Lorosa’e (UNTL), Fakuldade Sisensia Sosiais, Departementu Komunikasaun Sosial, iha tinan 2013 to’o 2018, iha Fauku.

Nia edukasaun iha titlu maestradu iha Komunikasaun Sosial ne’ebe nia hetan husi Universidade Dr. Soetomo, Surabaya, Indonesia.