PM Xanana Husu SECOOP Promove BaFo Kay Rala to’o Area Remota

DILI, www.news-viptv.com – Primeiru Ministru Kay Rala Xanana Gusmão husu ba Sekretaria Estadu Kooperativa (SECOOP) atu halo promosaun ba produtu Batar-Fos (BaFo) Kay Rala to’o iha area remotas sira.

Apela Xefi Governu ne’e hato’o iha lansamentu nasional Produtu Kooperativas iha feira nasional ho tema Komsome Sá-ida maka ida Produz no Produz Sá-ida maka Konsome, ne’ebe halao durante loron tolu hahu 20 to’o 22 Dezembru 2023, iha Portu Dili.

“Ohin temi bei-beik Batar no Fos (BaFo) tanba ninia diak maka kuda iha fatin ne’ebé deit, kuda iha iklima saida deit, no lapresiza bee barak maibe ninia produsaun kontinua fó rezultadu diak kompara ho haré no batar. Ida fali mos kuda dala ida bele silu dala tolu, ninia kaín sira tesi fo han animal. Tanba ohin loron ita depedénsia deit fos importasaun husi rai liur, husu ba SECOOP mobiliza povu agrikultór sira hodi involve-aan iha Movimentu Kooperativa sira atu produz nafatin,” dehan PM Xanana iha nia deskursu, Kuarta (20/12/2023).

PM Xanana mos husu ba grupu no movimentu kooperativa sira atu bele produz mos hare no Kooperativa MOKATIL sira nafatin produz BaFo.

“Hau koñese membru MOKATIL sira, sira serbisu ho laran duni, ida ne’e maka ita tenki dudu ba oin. Maibe Movimentu Kooperativa sira labele produz deit maka BaFo Kay Rala, maibe produz mos produtu sira seluk hanesan, uvas, hudi, abokate, no selu-seluk tan,” hateten xefi governu ne’e.

Sekretariu Estadu Kooperativa, Eng. Arsénio Pereira da Silva, M.Agr esplika katak objetivu lansamentu nasional ba produtu kooperativa ne’e maka atu halo promosaun ba produtos kooperativas ne’ebe membrus movimentus kooperativas sira mak produs, liliu BaFo Kay Rala ba material prima industria nian, atu sai dieta ka hahan ema nian nune’e mos ba hahan balada sira nian.

“Kommodity ida ne’e nia iha multifungsaun no iha valor ekonomiku, sosial, no ekolojika. Tamba ne’e iha lansamentu ida ne’e SECOOP ho movimentu Kooperativa sira hakarak promove liu hosi lansamentu ida ne’e no oferese gratuitu ba partisipante sira no vizitante sira no kontinua nafatin hodi nune’e ema hotu toman han, hare husi nia vantajen no valores ekonomiku, social, kultura, no ekolojika,” dehan Arsenio.

BaFo Kay Rala, esplika sekretariu estadu ne’e, iha politika no programa governo tama ona ba lista menu merenda escolar.

“WFP nu’udar parseiru ba programa school feeding halo ona parseiria ho MOKATIL no SECOOP para atu produz no prosesa ba aihan oioin no komuniti oi-oin ne’ebé nutritivu hodi fornese ba merenda escolar iha Timor -Leste,” nia dehan.

Ba Feira Nasional nian, SECOOP mos fasilita espasu ba grupu no movimentu kooperativa sira hodi hatudu sira nia produtu ida-idak hodi nune’e bele sai produtu nasional ne’ebe Timor-Leste bele produz rasik ona.