PM Xanana: Governu La Duni Povu, Fo Indiminizasaun ba Uma Afetadu Sira

DILI, www.news-viptv.com – Relasiona ho eviksaun ne’ebe governu halo ba komunidade sira iha area Fomento II Mota Comoro nian, Primeiru Ministru Xanana Gusmao hateten, governu sei fo indiminizasaun.

Hafoin inkontru semanal ho Prezidenti Republika, Primeiru Ministru esplika governu iha nia planu eviksaun sei la husik komunidade ida nia uma ne’ebe hetan eviksaun la ho indiminizasaun.

Primeiru-Ministru mos hateten, ba komunidade sira ne’ebe afetadu husi eviksaun nian maka sedauk simu indiminizasaun bele hakerek karta ba nia.

Foin lais ne’e hamutuk uma 288 iha Fomento II maka hetan eviksaun ho razaun hela iha fatin ne’ebe risku iha mota ninin no rai estadu nian.

Foin lais ne’e, SEATOU mos informa ona fulan oin, tuir planu governu sei halo eviksaun mos iha areia Kuluhun to’o Fatu-Ahi no mos area balun ne’ebe iha ona lista ba planu eviksaun nian.