PAM Dili: Soe Lixu Arbiru Sei Hetan Sansaun

DILI, www.news-viptv.com – Prezidente Autoridade Munisípiu Dili (PAM Dili), Gregorio Mouris Saldanha iha nia lideransa sei aplika sansaun ou multa ba ema ne’ebe soe lixu arbiru.

Sansaun ne’e, esplika Gregorio atu disiplina komunidade nia konsiensia atu kontribui mos ba Dili HAMURAK nu’udar slogan Kapital Dili nian ne’ebe nia deklara ona wainhira simu posse nu’udar PAM Dili.

“Hau koalia ona ho senhor Primeiro Ministro, Ministru Estatal senhor Tomás Cabral katak atu hahu fo sansaun ba ema ne’ebe soe lixu arbiru tamba waihira la hahu mak sei la muda buat ida Tamba presisa konsiensia asumi responsabilidade,” dehan Gregorio ba ba VIP TV, iha seremonia loron nasional Veteranu, Domingo (3/3/2024), iha Palacio do Governo, Dili.

PAM Dili hare katak, lixu sai problema bo’ot ba Kapital Dili, liliu iha tempu udan halo be’e sa’e ba estrada no komunidade nian uma tamba be’e dalan ou valeta sira nakonu ho lixu no halo intupidu ba be dalan nian, inklui lori hotu lixu namkari iha estrada no tasi ibun.

“Dili nia situasaun ladun diak tenke hadia diak liu. Hau foti ona prioridades maske hau seidauk tama servisu hau foti prioridade tolu ida primeiro kedas mak lixu tamba iha tempu udan, lixu tenke rezolve bee dalan tenke hamos hadia,” dehan Gregorio.

Hodi prevene mos inundasaun iha tempu udan, PAM Dili mos sei mobiliza estudante, PNTL no F-FDTL hodi kuda ai-oan prevene erosaun ne’ebe iha tempu udan sempre lori rai tun barak hosi foho leten.

Atu Dili sai duni HAMURAK, nia mos planu ona programa urbaniku ba uma nian hodi hamosu bairo-bairo modernu ho modelu apartementu ne’ebe kompletu ho fasilidade komunidade nian.

“Ami iha planu prinsipiu ida ho filosofia ida katak ema aumenta rai la aumenta prontu ema mak aumenta hela deit, raí la aumenta ida, entaun ita buka metodologia hanusa para ita utiliza no poupa didiak ema barak atu rezolve entaun formato ida diak liu uma ne’e halo sa’e deit ema bolu apartamento. Depois kria bairus iha neeba iha fasilidade iha desportivo sira  klinika divertimento sira enkuantu fatin tau ema mate mos Timor seidauk iha. Mate la presisa taka dalan entaun tenke iha rumah maduka Governo mak halo Ka kompania ruma mak halo Maibe tenke fasilidades nee tenke iha atu Nune povu bele utiliza entaun ita evita ona la implika ona engrafamentus tamba rai kiik,” nia esplika.

Ba assuntu fan sasan, PAM Dili ne’e mos sei regula negosiante kiik oan sira ne’ebe halo negosiu iha estrada ibun hodi evita enfragamentu iha Kapital Dili.

“Entretanto prioridade seluk mos mak  Populasaun sira fan sasan iha estrada nee liga ho Merkado tenke prepara Merkado nee diak no luan maibe tenke kordena didiak tamba ema balun uza sala fatin neeba entaun ho utilizasau sala fatin,fatin nee sai klot tia entaun  tenke konfirma ho maluk sira ne’ebe fan sasan iha estrada ibun atu Labele implika tan engrafamentus ba dalan sira,” nia dehan.