Oknum PSIK Halo Teror ba Populasaun, Deputadu Sinarai Husu PNTL ho PSIK Halo Investigasaun

DILI, www.news-viptv.com – Relasiona ho oknum Polisia Sientifika Investigasaun Kriminal (PSIK) ne’ebe deskonfia halo terror ba jovem no populasaun iha Delta IV, Postu Administrativu Dom Aleixo, Munisipiu Dili, Deputadu FRETILIN, Florentinho Ximenes da Costa “Sinarai” husu ba PSIK atu halo investigasaun ba membru refere.

Iha plenaria Parlamentu Nasional, Segunda (17/2/2025), deputadu FRETILIN hateten, Francisco Monis Goncalves, oknum PSIK ne’ebe nia mensiona ne’e nu’udar eis membru efektivu ne’ebe hasai ona husi PNTL, ne’ebe ema hotu hatene iha moras mental.

“Hau bolu atensaun ba PNTL, ba problema ne’ebe akontese iha bairo Delta IV, Aldeia São Jose, Suku Comoro katak membru PSIK ida ho naran Francisco Monis Goncalves sempre halo terror ba populasaun iha Delta IV ho armas ne’ebe nia lori,” informa Deputadu Sinarai.

Nia esplika, Francisco Monis Goncalves nudar eis membru PNTL ne’ebe ema hotu hatene katak PNTL hasai tiha ona nia husi membru efektivu PNTL nian, maibe senor ida nee halo ema hotu iha Aldeia São Jose hakfodak tamba nia sai fali membru PSIK nian.

“PSIK rasik la halo analiza didiak molok rekruta senor Francisco nu’udar membru PSIK nian tamba senor ida ne’e iha hela moras kejiwaan ou moras mental mesmu senor ne’e hela iha bairo Delta IV nia sempre halo terror iha bairo refere.

Ho razaun ne’e, hateten deputadu FRETILIN ne’e, husu ba PSIK atu hare didiak fali personalidade nia membru ne’e no halo investigasaun mos ba kazu ne’ebe tiru kilat iha Delta IV no ameasa jovem ho populasaun iha aldeia refere.