Nurima Alkatiri: FRETILIN Iha Relasaun Amizade ho Palestina

DILI, www.news-viptv.com – Deputada bankada FRETILIN, Nurima Alkatiri hateten, Partidu FRETILIN iha relasaun amizade ho Palestina no lori ona Timor-Leste rekonese Palestina nu’udar estadu desde iha 2004 wainhira lidera Primeira Governu Konstitusional.

Oan feto husi eis Primeiru Ministru Mari Alkatiri informa ne’e ba VIP TV wainhira fo nia solidaridade direta ba Palestina iha ambitu Dili Internasional Marathona ho tema halai ba palestina, Sabadu (11/10/2025), iha resintu oin Palasiu Presidensial.

Nia mos esplika, nu’udar deputada ne’ebe durante ne’e hatudu momos nia solidariedade ba Palestina, Nurima rekonese katak maioria sosiedade barak maka sedauk komprende lolos saida maka akontese entre Israel no Palestina.

Hanesan Timoroan, nia mos iha esperansa loron ida Povu Palestina sei moris hakmatek no goza nia soberania hanesan mos Timor-Leste ne’ebe hetan ona nia independensia husi kolonialismu iha tinan barak.

Dili Internasional Marathona 2025 realiza husi inisiativa Prezidenti Republika, Jose Ramos Horta nu’udar mos premiadu nobel ba paz ne’ebe lori Timor-Leste hodi fo nia solidaridade humanu ba sofrimentu ne’ebe povu Palestina hetan dadauk ne’e husi funu ho Israel.