SIDNEY, www.news-viptv.com – Forsas Armadas Nova Zelandia iha nia koperasaun tekniku militar ho Forsas Armadas F-FDTL prontu kapasita membru F-FDTL sira ba armamentu tiru nian.
Kapasitasaun ne´ebe menciona ne´e hato´o deretamente hosi Xefe Estadu Maior Jenerál Forsas Armadas Nova Zelândia Air Marshal Kevin Short wainhira halo inkontru ho Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek iha inkontru bilateral ne´ebe realiza ihaShangri-La Hotel, Sydney, Australia, Tersa (26/7/2022).
“Hau hakarak hatete katak ami Timor – Leste nia komprimisiu ne’e, ami servisu hamutuk ho parseiru sira iha asia pasifiku hodi apoiu ajente seguransa sira para kombate hahalok a’at, hanesan terorista, imigrante ilegais no Trafiku droga sira, ida ne’e maka ami nia komprimisiu,” dehan Tenente Jenerál Falur Rate Laek iha komunikadu imprensa ne´ebe publika iha pajina offisial F-FDTL nian.
Alende ne´e, Tenente Jeneral Falur mos hato´o nia agdese ba konvite ne’ebé Nova Zelândia fó, konabá inkontru ne’ebé sei hala’o iha fulan Setembru tinan ne´e.
“Inkontru sira ne’e importante tebes atu ita bele koñese malu besik liutan nomós ami bele aprende esperiensia hosi Nasaun Nova Zelândia nian,” dehan Jeneral fitun tolu ne´e.
Nova Zelândia sai parseiru ba F-FDTL hahu kedas forma F-FDTL iha Metinaro hosi tinan 2001, tamba Nova Zelândia ninia kontijente ba apoiu INTERFET nomós ba Forsa estabilidade nasionál, fó formasaun ba Militár hahu kedas 2008 mai to’o agora total atus ida resin ona, no agora dadauk membru F-FDTL nain 6 sei hala’o hela kursu iha Nova Zelândia.
Alende formasaun kapasitasaun ba rekursu umanu, Nova Zelândia mós hamutuk ho F-FDTL hala’o ezersísiu barak ona iha Timor-Leste hanesan ezersísiu HARI HAMUTUK, nomós ezersísiu KATIPO ne’ebé F-FDTL ba partisipa iha Nova Zelândia ne’e pasu positivu tebes ba imajem Forsas Armadas nian.
“Ita tinan tinan iha programa bolu naran MAPTALLK’S ne’ebé hola konkluzaun no orientasaun sira, ita bele hala’o servisu tuir ida ne’e, foin dadauk ita labele realija programa ida ne’e tamba pandemia COVID 19 ita hala’o tuir virtual deit, maibé iha fulan Novembru ita sei kontinua fali,” dehan Tenente Jeneral Falur.
Nia hatutan, “Iha MAPTALLK’S ne’e ita iha referensia barak iha ne’eba hau hakarak realsa tan katak, liliu konabá armamentu tiru nian, sebele fó tan formasaun avansadu ba ami nia Militár sira, ida ne’e maka persija, hanesan espesialista konabá armamentu nian nomós konabá munisaun esklojivu sira ne’e.”
Iha fatin hanesan Xefe Estadu Maior Jenerál Forsas Armadas Nova Zelândia, Air Marshal Kevin Short, hateten, konabá ezersísiu sira ne’e tamba foin dadauk infrenta hela COVID 19, no foin mak remata.
“Agora dadauk ami nia Militár sira hala’o hela treinamnetu iha baze idaidak nian no ezersísiu KATIPO dala ruma ami sei hala’o iha tinan 2024,” dehan Kevin Short.
Parte Nova Zelândia komprende agora dadauk Timor-Leste iha prosesu konstrusaun Estadu, tamba foin halo 20 anos independénsia no Nova Zelândia prontu apoiu no suporta nafatin Forsas Armadas Timor-Leste iha kualker area ne’ebé maka F-FDTL persija.
“Konabá espesialista ba armamentu tiru nian ami sei hare iha tempo besik.” Dehan Kevin Short.
Partisipa iha enkontru ne’e mak hanesan Xefe Estadu Maior Jenerál F-FDTL Tenente Jenerál Falur Rate Laek, Adido Defeza Timor Leste ba Austrália Koronel Rizay, Xefe Kooperasaun Tekniku Militár Kapitaun Oky nomós Ajudante Kampo Xefe Estadu Maior Jenerál Kapitaun Juvinal Pinto.